دوو وەزارەت یاداشتیان واژۆ کردووە

یەکەی نیشتەجێبوون بە کەسوکاری شەهیدان دەدرێت

964+

پێشەوا محەمەد – سلێمانی

بۆ دابەشکردنی یەکەی نیشتەجێبوون بەسەر کەسوکاری شەهیدان و ئەنفالکراواندا وەزارەتەکانی شەهیدان و ئاوەدانکردنەوە یاداشتێکیان واژۆ کردووە.

یاداشتەکە بۆ نزیکبوونەوەیە لە جێبەجێکردنی هەنگاوەکانی دروستکردنی یەکەی نیشتەجێبوون بۆ ئەو کەسوکاری شەهید و ئەنفالکراوانەی تا ئێستا لە حکومەت سوودمەند نەبوون.

پێشتر بڕیار بوو زەویان پێبدرێت، بەڵام دواتر بڕیارەکە گۆڕاوە بەوەی یەکەی نیشتەجێبوونەیان بۆ دروستبکرێت.

“تەواوی لایەنە پەیوەندیدارەکان رەزامەندن و لاریان نییە لە دروستکردنی ئەو یەکانە بەڵام پڕۆسەکە درێژخایەنە و کاتی پێویستە”، ئەمە وتەی عادل مەلا ساڵح، وتەبێژی وەزارەتی کاروباری شەهیدان و ئەنفالکراوانە بۆ 964.

لە هەرێمی کوردستان 90 هەزار کەسوکاری شەهید موچە وەردەگرن.