ئەم جەژنە لە كەركوك 313 منداڵ لە دایك بوون

964+
كاروان ساڵحی – كەركوك

لە سێ رۆژی جەژنی رەمەزاندا لە كەركوك 313 منداڵ لە دایكبووە و 77 كەسیش بە رووداوی هاتوچۆوە بریندار بوون و دوو کەسیش لە مەلەکردن خنکاون.

ئەمرۆ سێشەممە 25.4.2023، فەرمانگەی تەندروستی كەركوك ئاماری سێ رۆژی جەژنی راگەیاند و دەڵێت: لەم سێ رۆژەی جەژندا، لە سەرجەم نەخۆشخانەكانی كەركوك 313 منداڵ لە دایكبووە.

لەبارەی رووداوەکانی هاتوچۆوەش، ئاماژە بەوە کراوە کە 77 هاوڵاتی بە هۆی رووداوی هاتوچۆوە بە برینداری سەردانی نەخۆشخانەکانیان کردووە بۆ وەرگرتنی چارەسەری.

هەر بەپێی راگەیەنراوەكە لە ماوەی ئەو سێ رۆژەدا 8785 نەخۆش سەردانی نەخۆشخانەكانی شارەكەیان كردووە، 213 نەشتەرگەری جۆراوجۆریش ئەنجامدراوە.

هاوکات دوو هاوڵاتی لە كاتی مەلەكردن خنكاون و دوو منداڵیش بە یاری دەمانچەی ساچمە بریندار بوون.

پێداچوونەوە: فەرمان سادق