ریال مه‌درید و میلان گه‌یشتنه‌ قۆناغی پێش كۆتایی چامپیۆنزلیگ

964+
ئه‌رسه‌لان عه‌بدوڵا

یانه‌كانی ریال مه‌درید و ئه‌ی سی میلان، دوای ده‌ربازبوون له‌ چێڵسی و ناپۆلی، گه‌یشتنه‌ قۆناغی پێش كۆتایی چامپیۆنزلیگ.

ئه‌مشه‌و “چوارشه‌ممه‌ 18.4.2023” یارییه‌كانی گه‌ڕانه‌وه‌ی قۆناغی هه‌شتی خولی یانه‌ پاڵه‌وانه‌كانی ئه‌وروپا به‌ڕێوه‌چوون.

یانه‌ی ریال مه‌درید له‌ ناو له‌نده‌ن بردنه‌وه‌ی به‌سه‌ر یانه‌ی چێڵسی به‌ ئه‌نجامی 2-0 گۆڵ دوورباره‌ كرده‌وه‌، كه‌ هه‌مان ئه‌نجامی یاریی چوون بوو له‌ مه‌درید.
گۆڵه‌كانی ریال مه‌درید رۆدریگۆی به‌ڕازیلی تۆماری كردن.

له‌ یارییه‌كی دیكه‌دا، كه‌ دیدارێكی تایبه‌تی ئیتالی بوو، یانه‌ی ئه‌ی سی میلان له‌ به‌ربه‌ستی ناپۆلی رزگاری بوو، كاتێك له‌ ناو یاریگه‌ی تیپه‌كه‌ی باشووری ئیتالیا به‌ 1-1 گۆڵ یه‌كسان بوون، له‌ یاریی چوونیشدا میلان به‌ 1-0 گۆڵ بردنه‌وه‌ی تۆمار كردبوو.

له‌ یارییه‌كه‌ی ئه‌مجاره‌دا گۆڵی میلان یاریزان جیرۆ تۆماری كرد، گۆڵی ناپۆلی ئۆسیمین تۆماری كرد.

جێی سه‌رنجه‌ هه‌ریه‌كه‌ له‌و دوو یانه‌یه‌ له‌ یارییه‌كه‌دا لێدانی په‌ناڵتیان له‌ ده‌ست دا.

به‌ كۆی هه‌ردوو یاری، میلان به‌ ئه‌نجامی 2-1 گۆڵ براوه‌ بوو.

به‌م دوو ئه‌نجامه‌، هه‌ردوو یانه‌ی ریال مه‌درید و میلان گه‌یشتنه‌ قۆناغی پێش كۆتایی چامپیۆنزلیگ.