ئەنجوومەنی باڵای فەتوا:
دیاریکردنی پارەی پەشیمانبوونەوە لە گرێبەستی کڕین و فرۆشتندا نادروستە
964+
پێشەوا محەمەد – سلێمانی
سەبارەت بەو پارەیەی وەک پەشیمانبوونەوە لە گرێبەستەکانی کڕین و فرۆشتندا دیاری دەکرێت، ئەنجوومەنی باڵای فەتوای هەرێم بڕیاریدا. “کارێکی ناپەسەندە و دروست نییە”.
پارەی پەشیمانبوونەوە سەرجەم گرێبەستەکانی کڕین و فرۆشتنی خانووبەرە، زەوی، ئۆتۆمبێل و هەر مامەڵەیەکی تر دەگرێتەوە.
ئەنجوومەنەکە دوێنێ دووشەممە 17.4.2023 ئەو روونکردنەوەیەی بڵاوکردووەتەوە.
له شه‌ریعه‌تدا مامه‌ڵه‌ی كڕین و فرۆشتن پێویسته بڕاوه‌یی و یه‌كجاری بێت و مه‌رجدار نه‌بێت به‌تایبه‌ت مه‌رجێك، كه له به‌رژه‌وه‌ندیی لایه‌نێك یان هه‌ردووكیان نه‌بێت. ئەمە قسەی ئەنجوومەنی باڵای فەتوای هەرێمە.
دەشڵێت، “دەکرێت لە گرێبەستەکاندا سێ رۆژ بۆ ماوەی پەشیمانبووە و هەڵوەشاندنەوە دابندرێت و ئەگەر کەموکوڕییەک لە لایەنێکیان دەرکەوت لەوکاتەدا بێ زیاد و کەم گرێبەستەکە هەڵبووەشێتەوە”.
سەبارەت بە پێبژاردنیش، ئەنجوومەنەکە باس لە رێگەیەکی دەکات و وەرگرتنی بە دروست دەزانێت، “ئەگەر هاتو لایەنێکیان زیانی بەرکەوت، بۆ نموونە کۆمپانیایەک دەڵێت بە سێ مانگ خانووێک بۆ کەسێک تەواودەکات و دوادەکەوێت دەکرێ زەرەکەی بۆ بژمێردرێت”.
ئەنجوومەنەکە ئاماژەی بەوەشداوە، وەرگرتنی پارە لە لایەن دەڵاڵ و نووسینگەکانەوە لە کاتی پەشیمانبوونەوەدا “حەرام”ـە و جگە لە حاڵەتێک کە لایەنەکان بە دیاری بیبەخشن.