لێڵ بوونی زێی گەورە کاریگەری بەسەر ئاوی ماڵان دروست نەکردووە

964+

فەرمان سادق

لەگەڵ ئەوەی ئاستی ئاوی زێی گەورە بەرز بووەتەوە و زیادی کردووە و ئاوەکەشی لێڵ بووە، بەڵام بەڕێوەبەری گشتی ئاوی هەرێم دەڵێت کاریگەری بەسەر ئاوی ماڵان دروست نەکردووە.

ئاری ئەحمەد، بەڕێوەبەری گشتی ئاو و ئاوەڕۆی هەرێمی کوردستان بە 964ـی راگەیاند، بەرزبوونەوەی ئاستی ئاوی زێی گەورە و لێڵ بوون و شێلوبوونەکەی کاریگەری بەسەر پڕۆژەکانی ئیفرازی 1 و 2 و 3 نییە.

بەڕێوەبەری گشتی ئاوی هەرێمی کوردستان ئەوەشی روونکردەوە کە تاوەکو کاتژمێر 12:04ـی نیوەڕۆی ئەمڕۆ چوارشەممە 12.4.2023، رێژەی لێڵبوونی ئاوی زێی گەورە 540 پلەیە، ئەمەش هیچ زیانێک لەسەر پڕۆژەکە دروست ناکات.

زیاتر روونی کردەوە، کەرەستە هەیە بۆ پاککرنەوەی ئاوی زێی گەورە تا رێژەی 5000 پلە.

964 دەزانێت، پڕۆژەی ئیفرازی هەولێر بە مادەی شەب ئاوەکەی پاک دەکاتەوە ئەگەر ئاستی لێڵ بوونەکەی بگاتە 1500 پلە، هاوکات ئەگەر لەوە زیاتر بێت تاوەکو 5000 پلەش ئەوا دەتوانن بە مادەی ئاچ یان پۆلیمەر ئاوەکە پاک بکەنەوە.

ئاری ئەحمەد، دڵنیایی ئەوە دەداتە دانیشتووانی هەولێر کە عەمبارەکانی ئاوی هەولێر تا رێژەی 90% پڕن لە ئاو، جگە لەمەش سروشتی وەرزەکە وەهایە کە خەڵک کەمتر ئاو بەکار دەهێنێت، ئەمە وایکردووە هیچ مەترسییەک نەبێت.

لە هاوینی 2021، بەهۆی لێڵ بوونی ئاوی زێی گەورە و نەتوانینی پاککردنەوەی کە شیاو بێت بۆ خواردنەوە، ماوەی زیاتر لە 10 دانیشتووانی ناو شاری هەولێر بێ ئاو بوون و نەتوانرا ئیفراز کاری پێ بکرێت.