"سوکایەتی بە هاوڵاتیان کردووە"

نورەدینەکەی تیکتۆک لە هەولێر دەستگیر کرا

شۆڕش قادری

نورەدینەکەی تیکتۆک دەستگیر کرا، ئاسایشی هەولێر دەڵێت، قسەی نەشیاوی وتووە و سووکایەتی بە هاوڵاتیان کردووە، هەر کەس شکاتی لێی هەیە با بچێتە ئاسایش.

بەپێی راگەیەنراوێکی بەڕێوەبەرایەتی ئاسایشی هەولێر، لەسەر سکاڵای چەند هاوڵاتییەک و بە تۆمەتی خراپ بەکارهێنانی ئامێرەکانی پەیوەندی و پێشێلکردنی بەها کۆمەڵایەتییەکان، دوای وەرگرتنی رەزامەندیی دادوەری لێکۆڵینەوەی ئاسایش، تۆمەتبارێکیان دەستگیر کردووە بە ناوی  (ک، م، م ) کە لە تۆڕی کۆمەڵایەتیی تیکتۆک بە (نورەدین) ناسراوە.

ئاماژە بەوەشکراوە، تۆمەتبار شەوانە، دوور لە هەموو ئاداب و رەوشتێک، سووکایەتی و قسەی نەشیاوی بە هاوڵاتیان کردووە، هاوکات پێشتریش لەسەر هەمان تۆمەت دەستگیر کراوە و سزای یاسایی دراوە.

ئاسایشی هەولێر داوا لە هاوڵاتیان دەکات، هەر کەسێکی دیکە سکاڵای یاسایی لەسەری هەیە، با سەردانی بەڕێوەبەرایەتییەکە بکات.