شەوى رابردوو منداڵێک لەناو نافورەى رێستۆرانتێک گیانى لەدەستدا

رێباز یونس – هەولێر

شەوى رابردوو، لە یەکێک لە رێستۆرانتەکانى شارى هەولێر، منداڵێک لەناو نافورایەک گیانى لەدەستدا، کەسوکارەکەى دەڵێن: کارەبا گرتوویەتى.

دلێر گەرمیانى کە باپیرەى منداڵەکەیە، بە 964ـى وت،”شەوى رابردوو کچەکەم و زاواکەم بۆ بەسەربردنى کاتێکى خۆش چوونەتە رێستۆرانتێک، لەوێ کە شوێنى یاریکردنى منداڵانیان هەیە منداڵەکەیان داناوە بۆ یاریکردن، بەڵام منداڵەکە چووەتە لاى نافورەکە و کارەبا گرتوویەتى”.
ئەو رەتى دەکاتەوە منداڵەکە لەنا نافوراکەدا خنکابێت و دەڵێت: کێبڵى رووتى کارەبا هەبووە و کارەبا گرتوویەتى، ئەو شوێنە کەمتەرخەم بوون.

منداڵەکە تەمەنى ساڵێک و 10 مانگە، کەسوکارى تا ئێستا سکاڵایان تۆمار نەکردووە، وەک باپیرى منداڵەکە دەڵێت: چاوەڕێى لێکۆڵینەوەى پۆلیس و ئاسایشن.

پێداچوونەوە: وریا فەتاح