میدیازان – هاوبەش ئەبوبەکر – سلێمانی
وەزارەتی بازرگانی دەڵێت، بەشە خۆراکی ئارد بۆنی نییە و پێشتر لە پشکنین دەرچووە و هاوڵاتییان دەتوانن نانی لێدروست بکەن.
ماوەی دوو رۆژە دەستکراوە بە دابەشکردنی چوارەم بەشە خۆراکی ئارد بەسەر هاوڵاتییاندا، لەو کاتەوە هەواڵی ئەوە بڵاوبووەتەوە گوایە ئاردەکە گونجاو نییە بۆ بەکارهێنان و بۆنی لێدێت.
میدیازان پەیوەندی کرد بە نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی، ئەو وتی، ئاردەکە لە رێگەی تەنووری عامودی و ئاشەکانیانەوە پشکنینی بۆ کراوە و لە پشکنین دەرچووە و شیاوە بۆ بەکارهێنان.
لەلایەکی دیکە، ئەندامێکی ئەنجومەنی پارێزگای سلێمانیش دەڵێت، تاوەکو ئێستا هیچ کەسێک پەیوەندی پێوە نەکردوون و سکاڵا بکات لەوەی ئاردەکە بۆنی هەیە، “بەڵام لە هەرشونێک بەشە ئاردی دابەشکراو بۆنی هەیە با هاوڵاتیان وەری نەگرن.”
کاسترۆ مەعروف، ئەندامی ئەنجومەنی پارێزگای سلێمانی و ئەندامی لیژنەی کشتوکاڵ بە میدیازانی راگەیاند، ئاردی هەر کارگەیەک بۆنی هەبێت، کارگەکە پابەند دەکەن بیگەڕێنێتەوە و ئاردی تر بنێرێت.
بەپێی زانیارییەکانی بەڕێوەبەری گشتیی بازرگانی لە وەزارەتی بازرگانی و پیشەسازیی هەرێم، بۆ بەشەخۆراکی ئاردی هەموو مانگێک ٦٠ تۆن گەنم دەکرێت بە ئارد و ١٣ تۆن کەپەک و ٤٧ تۆن ئاردی لێدەردەچێت.
