دکتۆر سامان بەرزنجی لە چین بەشداری کۆنفڕانسێکی گەورەی پزیشکی دەکات

ژێوار خدر

دکتۆر سامان بەرزنجی، وه‌زیری ته‌ندروستی حکومەتی هەرێمی کوردستان، لەسەر بانگهێشتنامەی فەرمی دەزگای نیشتمانی تەندروستی چین، گەیشتە ئەو وڵاتە و بەشداری لە کۆنفڕانس و پێشانگای نێودەوڵەتی تەندروستی IMC کرد، کە تێیدا نوێترین داهێنانەکانی تەکنەلۆژیای پزیشکی و سیستەمی ژیری دەستکرد بۆ بواری چارەسەری نمایش کران.

دکتۆر سامان بەرزنجی وەزیری تەندروستی رایگەیاند، ئەم بەشدارییە لەسەر داوەتنامەی ناوەندی توێژینەوە و هەماهەنگی دەزگای نیشتمانی تەندروستی چین (National Health Commission) بووە. لەوێدا چاوی بە وەزیرانی تەندروستی وڵاتانی جیهان و نوێنەرانی رێکخراوی تەندروستی جیهانی WHO کەوتووە و پێکەوە تاوتوێی رێگەکانی بەرەوپێشبردنی سیستەمی پزیشکی و رێکارە نوێیەکانی هەماهەنگی نێودەوڵەتییان کردووە.

وەزیری تەندروستی لە پەراوێزی کۆنفڕانسەکەدا، پێشانگای ئامێر و تەکنەلۆژیای سەردەمیانەی بەسەرکردووەتەوە، کە تێیدا دواهەمین پێشکەوتنەکانی بەڕێوەبردنی تەندروستی دیجیتاڵی و بەکارهێنانی ژیری دەستکرد خرابوونە روو.

دەشڵێت، ئامانجی ئەم بەشداریکردنە و تێڕوانینی رێکارە نوێیەکان، بۆ ئاشنابوونە بە دواهەمین پێشکەوتنەکانی جیهان لە پێناو پەرەپێدانی سیستەمی تەندروستی و دابینکردنی باشترین خزمەتگوزاری پزیشکی لە هەرێمی کوردستان.