لە شەقامی 40 مەتری هەولێر پاسێک وەرگەڕا

ئەحمەد شەمزین – هەولێر

شەوی رابردوو رووداوێکی سەختی هاتوچۆ لە نێوان پاسێکی نەفەرهەڵگر و ئۆتۆمبێلێکی تایبەت لەسەر شەقامی 40 مەتری لە شاری هەولێر روویدا و بەهۆیەوە پاسەکە وەرگەڕا.

پەیامنێری 964 لە شوێنی رووداوەکەوە ڤیدیۆی تۆمارکردووە و دەڵێت، ئۆتۆمبێلە تایبەتەکە کە لە جۆری (تۆیوتا کۆرۆلا) بووە، بە خێراییەکی زۆرەوە هاتووە و کێشاویەتی بە پاسەکەدا، ئەمەش بووەتە هۆی ئەوەی پاسەکە کۆنترۆڵ لەدەستبدات و بە لایەکدا وەرگەڕێت، تیمەکانیی هاتوچۆش پێیان راگەیاندووە، تەنیا شۆفێری پاسەکە بە سووکی برینداربووە و رەوانەی نەخۆشخانە کراوە.

بەهۆی سەختی رووداوەکە، زیانێکی ماددیی زۆر بەر ئۆتۆمبێلەکان کەوتووە، هیچ زیانێکی گیانی یان گیانلەدەستدان نەبووە، شۆفێری پاسەکە بە سووکی بریندار بووە و گەیەندراوەتە نەخۆشخانە و باری تەندروستی جێگیرە، شۆفێری ئۆتۆمبێلە تایبەتەکەش بە سەلامەتی لە رووداوەکە رزگاری بووە.

پێداچوونەوە: پەری ساڵح