ئاماری گیانلەدەستدان لە ڤەنزوێلا بۆ زیاتر لە 160 کەس بەرزبووەوە

شۆڕش قادری

تادێت ئاماری قوربانیانی دوو بوومەلەرزەکەی ئەمڕۆی ڤەنزوێلا بەرزتر دەبێتەوە و بەپێی دوایین ئامارەکان زیاتر لە 160 گیانیان لەدەستداوە و بریندارەکانیش لە هەزار کەس نزیک دەبێتەوە.

دێڵسی رۆدریگێز سەرۆکی کاتی ڤەنزوێلا بە میدیاکانی راگەیاند، بەهۆی بوومەلەرزەکانەوە تا ئەم کاتە 164 کەس گیانیان لەدەستداوە و 971 کەسی دیکەش برینداربوون.

ئاماژەی بەوەشکرد، تیمەکانی فریاکەوتن بەخێرایی بەرەوە ناوچە زیانلێکەوتووەکان دەڕۆن بۆ ئەوەی هەرچی زووە بە هانای ئەو کەسانەوە بچن کە ژێر داروپەردووی رووخاوی خانوو و باڵەخانەکان کەوتوون.

بەربەیانی ئەمڕۆ پێنجشەممە 25.6.2026 بوومەلەرزەیەک بەگوڕی 7.2 پلە بەپێوەری ریختەر لە 160 کیلۆمەتری رۆژئاوای کاراکاس روویدا و هەر دوای ئەوەش و لە کەمتر لە یەک خولەکدا بوومەلەرزەیەکی دیکە بە گوڕی 7.5 پلە روویدا کە بە گەورەترین بوومەلەرزە دادەنرێت لە ماوەی زیاتر لە سەدەیەکدا ئەو وڵاتەی گرتبێتەوە، دوای کارەساتەکەش زیاتر لە 20 پاشلەرزەی دیکە تۆمارکراون.