لە گوندێکی خورماڵ دوو سەرپێچیکار دەستگیرکران

فەرهاد حەسەن

بەڕێوبەرایەتی پۆلیسی دارستان و ژینگەی هەڵەبجە بڵاویکردەوە، بە تۆمەتی لێدانی بیری نایاسای دوو سەرپێچیکاریان لە خورماڵ دەستگیرکردووە.

رووداوی دەستگیرکردنەکەیان درەنگانی شەوی رابردوو بووە بەڵام پۆلیسی دارستان ئەمڕۆ بڵاویکردووەتەوە و دەڵێت، شەوی رابردوو بنکەی پۆلیسی دارستان و ژینگەی خورماڵ، لە گوندی ریشێن بە فەرمانی دادوەری لێکۆڵینەوەی هەڵەبجە توانیان دوو سەرپێچیکار دەستگیر بکەن سەرقاڵی لێدانی بیری نایاسای بوون.

لەگەڵ دەستگیرکردنیان، دەستیان گرتووە بەسەر ئامێر و سەرجەم ئەو کەرەستانەی بیرەکەیان پێ لێدەدا.

دەڵێت، پەڕاوی لێکۆڵینەوە بۆ سەرپێچیکاران کراوەتەوە و لەبەشی پۆلیسی دارستان و ژینگەی هەڵەبجەش بەند کراون.