وەزارەتی دارایی بەڕێوەبەری گشتی نوێی بودجەی هەرێمی دەستنیشانکرد

فەرهاد حەسەن

وەزارەتی دارایی هەرێم بلاویکردەوە، ئەمڕۆ ئاڵوگۆڕ لە پۆستی دوو بەڕێوەبەری بەڕێوبەرایەتی گشتی وەزارەتەکەی ئەنجامداوە، یەکەمیان بەڕێوەبەری گشتی نوێی بودجەی هەرێم و دووەمیشیان بەڕێوەنەری بانکی ناوەندی لە سلێمانی.

بەپێی راگەیەندراوێکی وەزارەتەکە ئەمڕۆ یەکشەممە 17.5.2026 لە دیوانی وەزارەت بە ئامادەبوونی ئاوات شێخ جەناب وەزیری دارایی و ئابووری ئاڵوگۆڕ لە هەردوو بەرپرسیارێتی بەڕێوەبەری بەڕێوەبەرایەتی گشتی بودجە و بەڕێوەبەرایەتی گشتی بانکی ناوەندی هەرێم / سلێمانی ئەنجامدران.

دکتۆر ماکوان جەمیل بەڕێوەبەری پێشووی بانکی ناوەندی هەرێم / سلێمانی وەک بەڕێوەبەری گشتی بودجە بەوەکالەت لە وەزارەتی دارایی و ئابووری دەستبەکار بوو، هەمانکات کەمال رەئوف وەک بەڕێوەبەری گشتی بانکی ناوەندی هەرێم / سلێمانی بەوەکالەت دەستبەکاربوو، سەرەڕای بەردەوامی لەسەر کاری پێشووی وەک بەڕێوەبەری گشتی گومرگ.

وەزیری دارایی و ئابووری هیوای سەرکەوتنی بۆ هەردوو بەڕێوەبەری گشتی خواست و پشتیوانی خۆی و وەزارەتی بۆ سەرخستن و باشتر بەڕێوەبردنی کارەکانیان دووپاتکردەوە.