ئەم دوو رۆژە تۆزوخۆڵێکی سووکمان دەبێ؛ باشتر وایە دەمامک ببەستن

شۆڕش قادری

ئەمڕۆ و سبەی ئەگەر چوونە دەرەوە دەمامک هەڵبەستن، چونکە ئاسمان تۆزوخۆڵاوییەوە و بۆ تەندروستی خۆتان باشە ئەو کارە بکەن، بەڵام هەواڵە خۆشەکە ئەوەیە کە لە هەندێک شوێن نمەباران دەبارێ و کەشەکەش فێنکتر دەبێت.

بەپێی پێشبینییەکانی کەشناسی هەرێم، ئەمڕۆ سێشەممە 12.5.2026 ئاسمان بە گشتی نیمچە هەور دەبێت لەگەڵ بارینی کەمێک نمە باران و هەورە بروسکە لە کاتەکانی دوای نیوەڕۆ لە ناوچە شاخاوییەکان و سەنتەری شارەکان، هەروەک تۆزێکی سووک لە کەشدا دەبینرێ، بەتایبەتیش لە ناوچەکانی رۆژهەڵات و باشووری هەرێم، پاشان ئاسمان لە شەودا دەگۆڕێت بۆ پەڵەهەور.

بۆ سبەی چوارشەممەش ئاسمان ساماڵ و پەڵەهەور دەبێت، لە ناوچەکانی باکووری هەرێم نیمچە هەور دەبێت لەگەڵ ئەگەری کەمێک نمە باران و هەورە بروسکە لەم ناوچانە، هەروەها ئەگەری بەرزبوونەوەی تۆزوخۆڵ هەیە بەتایبەت لە ناوچەکانی باشووری هەرێم و گەرمیان لە کاتەکانی دوای نیوەڕۆوە.

پلەی گەرماش بەراورد بە تۆمارکراوەکانی ئەمڕۆ یەک بۆ سێ پلە نزمتر دەبێتەوە.

بەرزترین پلەکانی گەرمای پێشبینیکراو بە پلەی سیلیزی بۆ ئەمڕۆ؛

هەولێر: 32 پلەی سیلیزی

پیرمام: 27 پلەی سیلیزی

سۆران: 28 پلەی سیلیزی

حاجی ئۆمەران: 19 پلەی سیلیزی

سلێمانی: 30 پلەی سیلیزی

چەمچەماڵ: 33 پلەی سیلیزی

دهۆک: 32 پلەی سیلیزی

زاخۆ: 32 پلەی سیلیزی

هەڵەبجە: 33 پلەی سیلیزی

گەرمیان: 37 پلەی سیلیزی