"زیانیان بەکەس نەگەیاندووە"
بەهۆی رەشەباوە منارەکانی مزگەوتێکی رانیە کەوتن
964+
فەرمان مەلاحەسەن – رانیە
جگە لە برینداربوونی ژمارەیەک هاوڵاتی و رووخانی کەپر و کۆشکی کاسبکاران، بەهۆی رەشەباوە هەردوو منارەکانی مزگەوتی جافان لە رانیە کەوتنەسەر زەوی.
هێمن مەحمود مامۆستای ئایینی و وتارخوێنی مزگەوتەکە بە 964ـی وت، “منارەکان بە ئاسنێکی تۆکمە و بەقایمی لە ساڵی 2017ـەوە دانراون و تا ئێستا هیچ کێشەیەکیان نەبووە، بەڵام بەهۆی رەشەبا بەهێزەکی دوێنێوە کەوتوون و ئەوەش لە دەسەڵاتی هیچ کەسێکدا نییە”.
ئاماژەی بەوەشکرد، منارەکان 15 مەتر بەرزن و لەکاتی کەوتنیاندا زیانیان بە کەس نەگەیاندووە، یەکێکیان کەوتووەتەسەر بانی ماڵی براکەی و ئەوەی دیکەشیان لەسەر بانی مزگەوتەکەیە، ئەگەر چاک بکرێنەوە چاکیان دەکەنەوە، ئەگەرنا دەبێ دوو منارەی دیکە بکڕن.
دوێنێ ئێوارە لە دەڤەری راپەڕین تەرزەیەکی دەنک گەورە باری و لەگەڵ ئەوەشدا رەشەبایەکی بەهێزی لەگەڵ بوو، بەپێی راگەینراوێکی تەندروستی راپەڕین، بەهۆیەوە 35 کەس برینداربوون، جگە لەوەش 18 فیدەری کارەبا کەوتوون و ژمارەیەک دار و درەختی زۆریش شکاون.
پێداچوونەوە؛ شۆڕش قادری
