شەوى رابردوو چى روویدا؟

وریا فەتاح

شەوى رابردوو خەڵکى کوردستان لەبەر دەنگى درۆن لە دڵەراوکێ دابوون، ئەم بەیانییەش عێراقییەکان دڵەڕاوکێى هەڵبژاردنەکەیان هەبوو، عێراق دواى 40 ساڵ خەونەکەى هاتەدى و گەیشتە مۆندیال، هاوڵاتیانى کوردستانیش دەیانەوێت دوور لە دەنگى درۆن بخەون، ترەمپ و نەتەنیاهۆ و عێراقچى قسەیان کرد، بەڵام هەریەکەیان بە باى خۆى شەن و کەوى دەکات.

بۆ ئەوەی لە هەواڵەکان دانەبڕێن کورت و پوخت هەموو ئەو رووداوانەی لە چەند کاتژمێری رابردوو روویانداوە لێرەدا بیزانن؛

📌شه‌وی رابردوو ژماره‌یه‌ك درۆنی دیكه‌ ئاراسته‌ی شاره‌كانی كوردستان كران، به‌ تایبه‌تی هه‌ولێر و سلێمانی و دەنگى بەهێزیش لە سنوورى خەلیفان و دۆڵى ئالانەى، بیستران و دەبەندیخان، بیستران.
📌 لە هەولێر دەنگەکان زۆر بەهێز بوون، لە ماوەى چەند خولەکێکدا زیاتر لە 10 دەنگ بیستران و سیستمى بەرگرى تێکى شکاندن.
📌 پاشماوەی یەکێک لە درۆنەکانیی هەولێر لە گەڕەکی نوسەران بەر ماڵێک کەوتووە و سەقفى ماڵەکەى کونکردووە.
⭕️ ئەو ماڵەى درۆنەکەى بەرکەوتووە، بەنەتەوە عەرەبن و خەڵکى روومادین.
📌 هەر شەوی رابردوو، ئومێد خۆشناو پارێزگاری هەولێر رایگەیاندبوو: زیاتر لە 20 درۆن لە ئاسمانی هەولێر خراونەتە خوارەوەو خۆشبەختانە هیچ زیانێکی گیانی نەبووە.
📌 جا کێشەکان هەر درۆن نین، نه‌بوونی غازی ماڵان له‌ كوردستان به‌رده‌وامه‌ و خەڵک بە کاتژمێر لە نۆرەدا دەمێننەوە و زۆرینەشیان بە بوتڵى خاڵى دەگەڕێنەوە.
📌 ئەم بەیانییەش کاتێک زۆرینەى زۆرى عێراقییەکان بۆ سەیرکردنى یارى هەڵبژاردەکەیان لە خەو هەڵسابوون، دەنگێکى گەورە لە هەولێر بیسترا و دواتر دوکەڵێکى گەورە ئاسمانى شارەکەى داپۆشى، بەڵام نازانرێت پەیوەندى بە دەنگەکەوە هەیە یان نا.
📌 هەڵبژاردەى عێراق یارییەکەى لە پۆلیڤیا بردەوە و دواى 40 ساڵ بە مۆندیال شاد بووەوە.
⭕️ سەرکەوتنى عێراق، ئەمڕۆ و سبەینێى لە عێراق کردە پشوو، بەڵام هەرێمى کوردستان ناگرێتەوە.
📌 ئێوارەى دوێنێ، شیلی کێتلۆسۆن رۆژنامەنووسى ئەمریکى، لە ناوەڕاستى بەغدا رفێندرا، تۆمەتبارێک دەستگیرکراوە، بەڵام هەوڵەکان بۆ رزگارکردنى رۆژنامەنووسەکە هێشتا بەردەوامە.
📌 لەسەر ئاستى جیهان و ناوچەکەش دۆخەکە هەر ئاڵۆزە، هێرشەکانى ئیسرائیل و ئێران بۆسەر یەکترى بەردەوامن.
📌 ئەم بەیانییە، بۆمبێکى هێشووى لە ناوەراستى ئیسرائیل کەوتە خوارەوە و 14 کەس بریندار بوون.
📌 ئەمریکا و ئیسرائیل و ئێران قسەیان کرد، هەرسێ لا بێمنەتن و کەس نازانێت کێ براوە و کێ دۆڕاوە.
📌 عەباس عێراقچى: تاوەکو ئێستا هیچ وەڵامێکمان بۆ ئەو 15 پێشنیارەی ئەمریکییە نەناردووە و ئێمەش هیچ پێشنیار و مەرجێکمان نەکردووە.
📌 بنیامین ناتەنیاهۆ: ئەو رژێمەی ساڵانێکە دروشمی مەرگ بۆ ئەمریکا و ئیسرائیل دەڵێتەوە، ئێستا لە هەموو کاتێک لاوازترە و ئیسرائیلیش لە هەموو کاتێک بەهێزترە، بۆیە “درەنگ یان زوو ئەو رژێمە دەکەوێت”.
📌 دۆناڵد ترەمپ: دوو بۆ سێ هەفتەی تر ئێران بەجێدەهێڵین، هیچ هۆکارێکیش نییە بۆ مانەوەمان، چونکە تاکە ئامانجم ئەوەبوو رێگرى بکەم لە دەستکەوتنى چەکى ئەتۆمى لەلایەن ئێرانەوە