بووەتە دیاردە
مەڕووماڵات نەمامی بەگۆڕستانی كونەسێ لە رانیە نەهێشتووە
+964
ئەحمەد محەمەد _ رانیە
بەهۆی بەڕەڵاكردنی مەڕوو ماڵاتەوە، هەرچی نەمامی گۆڕستانی كونە سێی قەزای رانیەیە لەناوچوون و لەحاڵەت دەرچووە و بووەتە دیاردە.
بیتوێن سەعید، هاوڵاتییەكە و بۆ جەژن سەردانی گۆڕی دایكی و باوكی كردووە و بە 964ی وت، ئەمڕۆ كاتێك سەردانی گۆڕی دایك و باوكم كرد، بینیم مەڕوو ماڵاتێكی زۆر لە ناو گۆڕستانەكەیە و هەرچی نەمامی سەر گۆڕەكانە خواردوویەتی، كاتێك كە دیمەنەكەم بینی خۆم پێنەگیرا و بزنەكانم دەركرد، بەڵام سوودی نییە و دووبارە دەگەڕێنەوە.
وتیشی، بەداخەوە لەوڵاتان گۆڕستانەكان بوون بە گوڵستان، لای خۆشمان بەم شێوەیە پڕیەتی لە قشپل و بۆگەناو.
ئاماژەی بەوەشكرد، دوا لە شارەوانی رانیە و لایەنی پەیوەندیدار دەكەین بەر بەو دیاردەیە بگرن و چارەسەرێكی بۆ بدۆزنەوە، چونكە ئێرە گۆڕستانێكی دێرینی قەزاكەیە و هەرچی ئازیزان و خەڵكی رەسەنی رانیە لێرە بەخاك سپێردراون.
964 پەیوەندی كرد بە ئەحمەد مەلا وسو، سەرۆكی شارەوانی رانیە لای خۆیەوە وتی، بەر بەحاڵەتەكە دەگرین و دوای جەژن رێكاری پێویست دەگرینەبەر و رێكاری یاسایش بەرامبەر ئاژەڵداران دەگرینەبەر.
پێداچوونەوەی: پەری ساڵح
