لۆگۆی وەزارەتی خوێندنی باڵای هەرێم
وەزارەتی خوێندنی باڵا:
“لە ئەمساڵەوە وانەى کوردى و عەرەبى ئەژمار دەکرێن”
964+
شۆڕش قادری
وەزارەتی خوێندنی باڵا و توێژینەوەی زانستی هەرێم بڕیارى ئارەزومەندانەى ئەژمارکردنى نمرەى وانەکانى کوردى و عەرەبى هەڵوەشاندەوە و لەئەمساڵەوە ئەو دوو وانەیە ئەژمار دەکرێن.
پاڵپشت بە نوێترین نوسراوى سەرۆکایەتى ئەنجومەنى وەزیران لە رۆژی 26.2.2026 و کۆنوسى لێژنەى تایبەتمەندى ئەنجومەنى وەزیران، وەزارەتى خوێندنى باڵا و توێژینەوەى زانستى لە نوسراوێکى فەرمیدا بۆ وەزارەتى پەروەردە روونیکردووتەوە کە (بڕیارى ئارەزومەندانەى ئەژمارکردنى نمرەى وانەکانى کوردى و عەرەبى هەڵوەشاوەتەوە و نمرەى ئەم دوو وانەیە هاوشێوەى وانەکانى تر ئەژمار دەکرێن بۆ ئەو خوێندکار و قوتابیانەى لە ساڵى خوێندنى (2025-2026) و ساڵانى دواتر لە پۆلى دوانزەى ئامادەیین) واتە لە ئەمساڵەوە نمرەى خوێندکاران و قوتابیانى پۆلى دوانزە لەسەر بنەماى هەر حەوت وانەکە دەبێت.
بۆ ئەو مەبەستە ئەمڕۆ سێشەممە 3.3.2026 لە نووسراوێکدا کە ئیمزاى د. ئارام محمد قادر وەزیرى خوێندنى باڵا و توێژینەوەى زانستى لەسەرە و ئاراستەى وەزارەتى پەروەردە کراوە، داوای هەڵوەشانەوەى بڕیارى ئارەزومەندانەى ئەژمارکردنى نمرەى وانەکانى کوردى و عەرەبی کراوە.
هەر لە نوسراوەکەى وەزارەتى خوێندنى باڵادا بۆ وەزارەتى پەروەردە روونکراوەتەوە کە بڕیارى ئارەزومەندانەى ئەژمارکردنى نمرەى وانەکانى کوردى و عەرەبى هەڵدەوەشێتەوە و نمرەى ئەم دوو وانەیە هاوشێوەى وانەکانى تر ئەژمار دەکرێن بۆ ئەو خوێندکار و قوتابیانەى لە ساڵى خوێندنى (2025-2026) و ساڵانى دواتر لە پۆلى دوانزەى ئامادەیین، واتە بۆ ساڵى خوێندنى (2026-2027) و ساڵانى دواتر داواکارى پێشکەش دەکەن بۆ وەرگرتنیان لە زانکۆکانى هەرێم.
داوایش لە وەزارەتى پەروەردە کراوە، هەموو قوتابخانە و خوێندنگاکان ئاگادار بکەنەوە لەوەی کە خوێندکاران و قوتابییەکانیان لەو بابەتە ئاگادار بکەنەوە.
