شار رەنگی مانگی خێرو خۆشی گرتووە و مۆبایلیش شوێنی مۆڵەتی شۆفێری دەگرێتەوە
+964
ژووری هەواڵ
بەیانی و نیوەڕۆی ئەمڕۆ لە یەکەم رۆژی رەمەزاندا کەشی ناو شارەکانی خۆمان بەتەواوی گۆڕابوون، سەرشەقام و دەوری چێشتخانەکان چۆڵتر بوون و دەوری مزگەوتەکانیش قەرەباڵغ و جمەیان دەهات، یەکسەر کەشە تایبەتەکەی مانگی رەمەزان بەهەموانەوە دەرکەوت.
ئەگەر لەمەودوا مۆڵەتی شۆفێرییەکەت بیرچوو هیچ کێشەت نەبێت، تەنیا لەسەر مۆبایلەکەت پیشانی پۆلیسی هاتوچۆو مەفرەزەکانی بدە ئیتر کارت مەیسەرە، بەڵام بە مەرجێک مۆڵەتەکەت لە جۆرە تازەکە بێت و ئەلکترۆنی بێت.
هێشتا رێگای هامڵتۆن سەلامەت نییەو کەڵکی ئەوەی نییە بەکاری بهێنن، ئەمڕۆ بەیانی بەشێکی رێگاکە بۆ ئۆتۆمبێلی بارهەڵگر کراویەوەو دانە دانە ئیزن دەدران، بەڵام زۆری نەخایاند بەشێکی دیکەی شاخەکە داڕماو رێگا گیرایەوە.
لە کەلار ژمارەیەک کەس چوونە بەردەم وەبەرهێنانی گەرمیان و وتیان دەبێ چارەیەکمان لێ بکەن ئەوە ساڵ زیاترە دەبوو خانووەکانمان بدەنێ کەچی هەر دەستی دەستیمان پێدەکەن.