"با لەم قۆناغەدا هاودەنگ و هاوهەڵوێست بین"
کەسوکاری ئەنفالکراوان بۆ پاڵپشتی لە کوردانی رۆژئاوای کوردستان هاتنەسەر شەقام
964+
میلاد جەلال – گەرمیان
بۆ پاڵپشتی لە کوردانی رۆژئاوای کوردستان، بەشێک لە کەسوکاری ئەنفالکراوان و هاوڵاتیانی قەزای رزگاری لە گەرمیان گردبوونەوە و داوا دەکەن، لەم قۆناغەدا کورد هاودەنگ و هاوهەڵوێست بێت.
بەختیار رەئوف بە 964ـی وت، “ئێمە وەکوو کەسوکاری ئەنفالکراوان زیاتر لە هەموو کەسێک هەست بەو ئازارە دەکەین کە لەئێستادا گەلەکەمان و خوشک و برایانمان لە رۆژئاوا جینۆساید دەکرێن”.
وتیشی، “داوا لە هەر کوردێکی بەشەرف دەکەین، لەسەر ئەو رووداوانە بێتەدەنگ و ناڕەزایەتی دەرببڕێت بۆ ئەوەی دەنگمان بگاتە وڵاتانی زلهێز”.
گەرمیان ئیبراهیم یەکێکی دیکە لە بەشداربووانی گردبوونەوەکە بە 964ـی وت، “هاتووین ناڕەزایەتی دژ بەو تاوانکارییە و جینۆسایدە دەرببڕین کە بەرامبەر دانیشتووانی گەڕەکەکانی شێخ مەقسوود و ئەشرەفیە لە حەلەب ئەنجام دەدرێت”.
بەپێویستیشی زانی، هەموو جارێک وەک ئەمجارە کورد، یەکدەنگی و یەک هەڵوێستی خۆی بپارێزێت.
پێداچوونەوە؛ شۆڕش قادری
