هەڵەبجە؛ شەقامی بەردەم نەخۆشخانەی عەنەب داخرا

ژێوار خدر

بەهۆی دەستپێکردنی کارەکانی پڕۆژەی بەردەم نەخۆشخانەی عەنەب لە پارێزگای هەڵەبجە، هەردوو سایدی شەقامی سەرەکی بەردەم نەخۆشخانەکە بەڕووی شۆفێراندا داخران و لە ئێستادا کاری هەڵکەندنی تێدا دەکرێت.

پاریزگای هەڵەبجە ئاگادارییەکی بڵاوکردووەتەوە و دەڵێت، بەهۆی کارکردنی تیمەکان لە پڕۆژەکەدا، هاتوچۆ لەو شەقامەدا راگیراوە، داخستنەکە بە مەبەستی خێراکردنی کارەکان و پاراستنی سەلامەتی شۆفێرانە لەو شوێنەی کە کاری هەڵکەندنی تێدا ئەنجام دەدرێت.

داواش لە شۆفێران دەکرێت بۆ دوورکەوتنەوە لە هەر رووداوێکی نەخوازراو و دروستنەبوونی جەنجاڵی، رێگای جێگرەوە بەکاربهێنن و پابەندی رێنماییەکان بن تا ئەو کاتەی کارەکانی پڕۆژەکە لەو شەقامەدا کۆتایی دێت.