باشترین هاندەری وەرزشی لە جیهان
هاندەرانی زاخۆ چۆن خەڵاتەكەیان بردەوە؟
964+
ئەرسەلان عەبدوڵا
ئەمڕۆ فیدراسیۆنی نێودەوڵەتیی تۆپی پێ، هاندەرانی زاخۆی وەك باشترین هاندەری وەرزشی بۆ ساڵی 2025 دەستنیشان كرد و خەڵاتی ئەمساڵی باشترینیان پێشكەش دەكات.
ئێوارەی ئەمڕۆ كاتژمێر 8:00 لە دەوحەی پایتەختی قەتەڕ ئاهەنگی خەڵاتەكانی زە بێست پێشكەش دەكرێت، كە فیفا ئەنجامی دەدات و لە ئێستاشەوە زاخۆ خەڵاتەكەی بەدەستهێناوە.
خەڵاتەكە چۆن بەدەستهات؟
لە 13.5.2025 لە یاریی زاخۆ و حدوود لە خولی ئەستێرەكانی عێراق، هاندەرانی یانەی زاخۆ لە یاریگەی خۆیان هەزاران بووكەڵەیان فڕێدایە ناو یاریگە، وەك پاڵپشتی بۆ منداڵانی تووشبووی شێرپەنجە.
ئەم دیمەنە بووە جێی سەرنجی هەموو عێراق و ناوچەكە، دواتر ڤیدیۆی دیمەنی هەڵدانی بووكەڵەكان بۆ فیفا نێردرا، بەمەش چووە ناو ركابەری بردنەوەی خەڵاتی باشترین هاندەر.
تا 28ی مانگی رابردوو هەموو كوردستانیان دەنگیان دا، هاوڵاتی و بەرپرسانی كوردستان و عێراق، كوردانی پارچەكانی دیكەی كوردستان،
كوردانی تاراوگە و بەشێك وڵاتانی دەوروبەر.
ئەمڕۆش فیفا رایگەیاند هاندەرانی زاخۆ یەكەمن و ئەمشەویش خەڵاتەكە وەردەگرن.
