شاعیر، رەفیق سابیر
روونکردنەوە لەبارەى دۆخی تەندروستى"رەفیق سابیر"ـەوە دەدرێت
خاوەنی شیعرى “بەتەنیا جێم مەهێڵن” تووشی شێرپەنجە بووە
964+
وریا فەتاح
پەیجی فەرمی شاعیری گەورەی کورد، د. رەفیق سابیر رایدەگەیەنێت، ناوبراو بەشێوەیەکی کتوپڕ تووشی نەخۆشیی شێرپەنجە بووە و بەهۆیەوە نەشتەرگەریی بۆ ئەنجامدراوە.
بەپێی روونکردنەوەکە، سێ هەفتە لەمەوبەر نەشتەرگەرییەکە کراوە و لە ئێستادا دۆخی تەندروستیی “جێگیرە” و نەخۆشخانەی جێهێشتووە، بەڵام هێشتا لەژێر چاودێریی وردی پزیشکیدایە بۆ وەرگرتنی چارەسەری تەواوەتی.
لە بەشێکی پەیامەکەدا هاتووە: “سوپاسی هەموو ئەو دڵسۆز و خوێنەرانە دەکەین کە پەیامیان ناردووە و خەمخۆری تەندروستی دکتۆر بوون، هەموومان چاوەڕێی گەڕانەوەی هێز و تەندروستیین بۆی”.
د. ڕەفیق سابیر، یەکێکە لە قەڵەمە هەرە دیارەکانی ئەدەبی کوردی و خاوەنی دەیان شاکارە، دیارترینیان هۆنراوەی بەناوبانگی “بەتەنیا جێم مەهێڵن”ـە، کە وەک مانیفێستێکی شیعری بۆ کارەساتی کیمیابارانی هەڵەبجە نووسیویەتی و لە یادەوەریی هەموو کوردێکدا بە زیندوویی ماوەتەوە.
ڕەفیق سابیر ساڵى 1950 لە قەڵادزێ لە دایکبووە، شاعیرێکی کوردی ھاوچەرخە کە شیعرەکانی بە زاراوەی سۆرانییە.
