سەیدسادقیش 30 ئۆتۆمبێلی پڕ پێداویستی دەنێرێت
لە عەربەتیش کەمپینێک بۆ کۆکردنەوەی هاوکاری بۆ چەمچەماڵ رێکخرا
بڕوا مجید – عەربەت
لە عەربەت دەست بە کەمپینێک کراوە بە کۆکردنەوەی هاوکاری بۆ لێقەوماوانی چەمچەماڵ وبڕیاریان وایە چەند رۆژێک بەردەوام بێت.
ئاسۆ شێخ محەمەد، سەرۆکی ڕێکخراوی پەنای کار و سەرپەرشتیار کەمپینەکە بە 964 ی وت، ماوەی دوو ڕۆژە لە ناحیەی عەربەت دەستیان کردووە بە کۆکردنەوەی هاوکاری بۆ لێقاوماوانی لافاوەکەی چەمچەماڵ، تیایدا پارە و پێداویستی ناوماڵ و جلو بەرگ و نەوت وەردەگرن.
وتیشی “خۆشبەختانە هاوڵاتیانێکی زۆر بەدەم کەمپینەوەکەوە هاتون، سبەینێش بەردەوام دەبین و دووسبەیش سەرجەم پێداویستیەکان دەگەیەنینە قەزای چەمچەماڵ و تەسلیمی هاوڵاتیانی دەکەین”.
هەر لە چوارچێوەی کۆکردنەوەی هاوکاری بۆ هاوڵاتیانی زیانلێکەوتوی چەمچەماڵ، دوێنێ لە قەزای سەیدسادق توانرا بڕی 25 ملیۆن و 383 هەزار دیناری کاش و دوو هەزار و 100 دۆلار لەگەڵ 30 ئۆتۆمبێلی پڕ لە پێداویستی ماڵان کۆکرایەوە و دەنێردرێت بۆ چەمچەماڵ، لەشارەزوریش کەمپینێک دەستیپێکردووە لە هەرسێ بازاڕی قەزای شارەزوور و ناحیەی زەڕایەن هاوڵاتیان دەتوانن هاوکاریەکانیان بگەیەنە کەمپینەکە.
پێداچوونەوە؛ فەرهاد حەسەن