لە رانیە چەند تاقیگە و کۆگایەکی دەرمان سزادران و داخران – وێنە: بەڕێوەبەرایەتی تەندروستی راپەڕین
"بەهۆی دەرمانی ماوەبەسەرچوو و نەبوونی مۆڵەت"
لە رانیە چەند تاقیگە و کۆگایەکی دەرمان سزادران و داخران
964+
شۆڕش قادری
لە رانیە، چەند تاقیگە و کۆگایەکی دەرمان، بەهۆی نەبوونی مۆڵەت و بوونی دەرمانی ماوەبەسەرچوو و بێ ستیکەر، سزادران و داخران.
بەپێی راگەیەنراوێکی بەڕێوەبەرایەتی گشتی تەندروستی راپەڕین، ئەمڕۆ سێشەممە 25.11.2025، بەشی پشكنین و بەدواداچوون بە ئامادەبوونی نوێنەری سەندیكا پەیوەندیدارەكان و نوێنەری بەڕێوەبەرایەتی ئاسایشی راپەڕین، چەند دەرمانخانە و كۆگا و تاقیگە و سەنتەر و كلینیكی ددانی ناحكومی لەناو شاری رانیەی بەسەركردووەتەوە.
دوای سەردان و پشکنینەکە، هەردوو تاقیگەی تەمەن و نۆڤین بەهۆی نەبوونی مۆڵەت و هەبوونی دەرمانی ماوەبەسەرچوو، سزا دراون و داخراون.
هاوکات شوێنەکانی (چارەسەری سروشتی و كەڵەشاخی ڕێباز)، (كۆگای دەرمانی فارمازۆن)، (تاقیگەی دەلانی)، (كۆگای دەرمانی ڕاپەڕین) بەهۆی نەبوونی مۆڵەت و نەگونجاوی شوێن و بوونی دەرمانی بێ ستیكەر، ئاگادار کراونەتەوە و سزاش دروان.
جگە لەو شوێنانەش، هەریەكە لە (كۆگای دەرمانی وەرتێ)، (دەرمانخانەی نۆڤین)، (دەرمانخانەی نوژدار)، (سەنتەری ددانی سینا)، (دەرمانخانەی تەمەن) ئاگادار كراونەتەوە و رێنماییان پێدراوە كە پابەندبن بە رێنماییەكانی وەزارەتی تەندروستی.
