بەڕێوەبەرى پێشوى کشتوکاڵى بەغدا سزاى لەسێدارەدانى بەسەردا سەپێندرا

وریا فەتاح

ئەمڕۆ سێشەممە، دادگای تاوانەکان لە عێراق، سزای لەسێدارەدانی بەسەر بەڕێوەبەری پێشووی کشتوکاڵی بەغداددا سەپاند.

ئەنجومەنی باڵای دادوەری لە بەیاننامەیەکدا، رایگەیاند: “تاوانبارەکە لەگەڵ گرووپێکی چەکداردا هەڵیکوتاوەتە سەر بەڕێوەبەرایەتی گشتی کشتوکاڵی بەغداد و لەگەڵ هێزە ئەمنییەکاندا تێکهەڵچووە”.

وەک ئەوەى باسکراوە، بەڕێوەبەرى پێشووى کشتوکاڵى بەغدا دواى ئەوەى بڕیارى دورخستنەوەى لە پۆستەکەى دراوە و کەسێکى دیکە لە جێگەى دانراوە، لەگەڵ گروپێکى چەکدارى هەڵیکوتاوەتە سەر بەڕێوەبەرایەتییەکە.

وەک باسکراوە، لە کاتى هێرشەکە، کارمەندێکى دەوڵەت و هاوڵاتییەک کوژراون و چەند کەسێکى دیکەش بریندار بوون.

ئەوەش خراوەتەڕوو کە “سزاکە بەپێی ماددەی چوارەم/1 و بەپێی ماددەی دووەم/1/3/5 لە یاسای بەرەنگاربوونەوەی تیرۆر ژمارە 13ی ساڵی 2005 دەرچووە.”