وێنە-تایبەت بە میدیازان
هەموو شارەوانییەکان چاوی لێ بکەن
کەلار بە سیستمێکی نوێ خۆی لە خۆڵ و خاشاک پاک دەکاتەوە
میدیازان – هونەر فارس – گەرمییان
+وێنە و ڤیدیۆ
بە دانانی دوو سندووق کە بە دوو بۆریی ژێرزەوییەوە بەستراونەتەوە، لەمەودوا چیتر خۆڵ و خاشاک لەناو بازاڕی شاری کەلار نابیندرێت.
سیستمەکە بە جۆرێکە، دوو بۆری لەمسەراوسەری بازاڕی کەلار لەژێر زەوی داندراون و دوو سندووقی گەورەی خۆڵ و خاشاکیش لە هەردوو سەری بازاڕەکەوە لەسەر دروست کراوە، دوکاندارەکان خۆڵەکە دەکەنە سندووقەکانەوە و لەڕێگەی ئامێری تایبەتیشەوە ڕۆژانە لە کۆتایی بازاڕەکەدا پاشماوەکان لە بۆرییەکەوە دەهێندرێنە دەرەوە و فڕێ دەدرێت.
“چیتر سەتڵی خۆڵ و پیسی بەسەر شەقامی ناوبازاڕەوە نابیندرێت و ئەو کارە زۆر باشە”، سەروەر سەباح، یەکێک لە دوکاندارەکانی بازاڕی کەلار وای وت.
“چیتر سەتڵی خۆڵ و پیسی بەسەر شەقامی ناوبازاڕەوە نابیندرێت و ئەو کارە زۆر باشە”
سیستمەکە لە چوارچێوەی نۆژەنکردنەوەی ناوبازاڕی کەلارە لە لایەن شارەوانیی شارەکەوە، کە هاوکات شاردنەوەی وایەری کارەبا و گۆڕینی ڕووکاری شەقامەکانیش لە قیرەوە بۆ بەردی کەرپستۆن لەخۆ دەگرێت و بە پێی زانیارییەکانی شارەوانیی کەلاریش ٩٠٪ کارەکان تەواو کراون. ئەکرەم ساڵح، سەرۆکی شارەوانیی کەلار بۆ میدیازان وتی: پڕۆسەی شاردنەوەی زبڵ و خاشاک لە قۆناغی کۆتاییدایە و سەرجەم سندووقەکان لە ژێر زەوی دانراون و هەرکات کارەکانی نۆژەنکردنەوەی شەقامی ناوبازاڕ کۆتایی هات، بە هەمان سیستم دەست بە کۆکردنەوەی زبڵ وخاشاک دەکرێت