ئاگرەكەی دارستانی هەیبەت سوڵتان کۆنتڕۆڵ کرا

دەشتی عارف

ئێوارەی ئەمڕۆ هەینی ئاگرێك لە دارستانی هەیبەت سوڵتان لە كۆیە كەوتەوە، بە قسەی بەرگریی شارستانی توانیویانە زوو كۆنتڕۆڵی بكەن و هۆكارەكەشی ئاگركردنەوەی گەشتیاران بووە و نیو دۆنمیش دارستانەكە سووتاوە.

عەمید گۆران ئەحمەد، بەڕێوەبەری بەرگریی شارستانی کۆیە، بە 964ـی وت، ئاگرەكە دەوروبەری كاتژمێر 5:30ی خولەكی ئێوارە بوو، چەند گەشتیارێک بەمەبەستی سەیرانکردن هاتوونەکە شوێنەکە و لەوێ ئاگرییان کردووەتەوە، لەوێوە ئاگرەکە تەشەنەی کردووە و نزیکەی نیو دۆنم سووتاوە، بەڵام هەر زوو لە رێگای تیمەکانی بنکەی زانکۆ ئاگرەکە کوژاوەتەوە و نەهێلدراوە تەشەنە بکات.

وتيشي، زیانەکان تەنیا سووتانی بەشێکی کەمی ناوچەکە بووە، چونکە بنکەی ئاگرکوژێنەوەی زانکۆ لە شوێنی رووداوەکە نزیک بوونە و هەرزوو گەیشتوونەتە شوێنەکە، ئەگەر وانەبووایە لەوانەبوو ئاگرەکە بەشێکی زۆری دارستانەکەی بسووتاندایە.

پێداچوونەوە: ئەرسەلان عەبدوڵا