رێنمایی توند بۆ ماتۆڕسواران دەرکرا

وریا فەتاح

بەڕێوەبەرایەتى گشتیى هاتووچۆ لە هەرێمی کوردستان، کۆمەڵێک رێنمایی نوێ و گرنگیان بۆ ماتۆڕسواران بڵاوکردەوە و تێیدا جەخت لەسەر پابەندبوون بە یاسا و رێکارەکانی سەلامەتی دەکەنەوە، جەختیشکراوەتەوە کە هەر سەرپێچییەک بەبێ چاوپۆشی رووبەڕووی لێپرسینەوە دەبێتەوە.

گرنگترین رێنماییەکان:

1.  مۆڵەتی شۆفێری: هەموو ماتۆڕسوارێک دەبێت هەڵگری مۆڵەتی شۆفێری بێت، کە دەتوانرێت لەدوای تەمەنی 16 ساڵییەوە داواکاری بۆ پێشکەش بکرێت.

2.  تۆمارکردن: پێویستە ماتۆڕسکیلەکە بە فەرمی لەلایەن بەڕێوەبەرایەتی هاتووچۆوە تۆمار کرابێت.

3.  کەرەستەی خۆپارێزی: بەکارهێنانی کڵاوی سەرپارێزی (کاسک) کوالیتی بەرز، هەروەها دەبێت کەلوپەلی دیکەی وەک (دەستکێش، پارێزەری ئەنیشک و ئەژنۆ، پێڵاوی تایبەت و جلوبەرگی گونجاو) بەکاربهێنرێت.

4.  پابەندبوون بە یاساکان: پێویستە ماتۆڕسواران بەتەواوی پابەندی یاساکانی وەک (وەستان لە ترافیک لایت، سنووری خێرایی، بەکارنەهێنانی مۆبایل) بن و لەکاتی پێچکردنەوە ئاماژەکان بەکاربهێنن. هەروەها دەنگی بڵندی ساڵۆنسا (ئاگزۆز) قەدەغەیە.

5.  وریایی لە نزیک قوتابخانەکان: لە کاتی وەرزی خوێندندا و لە نزیک ناوەندەکانی خوێندن، پێویستە خێرایی کەم بکرێتەوە بۆ پاراستنی ژیانی خوێندکاران.

6.  شۆفێری لە کەشی نالەبار: لە کاتی باران و بەفر و با، دەبێت زۆر بەوریایی شۆفێری بکرێت، چونکە کۆنترۆڵکردنی ماتۆڕسکیل زۆر قورستر دەبێت.

7.  سەرنشینی دووەم: بۆ هەڵگرتنی سەرنشین، پێویستە سەرنشینەکەش کڵاوی سەرپارێز بەکاربهێنێت و رێنمایی پێویستی پێ بدرێت بۆ چۆنیەتیی دانیشتن.

8.  خزمەتگوزاریی بەردەوام: گرنگیدان بە گۆڕینی رۆن، فلتەر، تەیەی نوێ و پارچەکانی تر، هەروەها پاکڕاگرتنی ماتۆڕسکیلەکە.

9.  بینین لە شەواندا: پێویستە لە شەواندا جلوبەرگی ڕەنگ کراوە یان فسفۆری لەبەر بکرێت تا لەلایەن شۆفێرانی دیکەوە بە ئاسانی ببینرێن.