پۆلیسی زاخۆ: کۆتاییمان بە دیاردەی قومار هێنا

شڤان عەبدوڵا- زاخۆ

دوای هەوڵ و بەدواداچوونێکی ورد کە 18 مانگی خایاند، پۆلیسی زاخۆ سەرکەوتنی خۆی لە داخستنی تەواوی شوێنەکانی قومارکردن لە شارەکەدا راگەیاند، ئەم هەڵمەتە چەندین جۆری قوماری گرتەوە، لە دۆمبەڵەوە تا سیستەمی یارییە جیهانی و ناوخۆییەکان و دانانی پارە لەسەر ژمارە.

بەڕێوەبەرایەتیی پۆلیسی زاخۆ تیمێکی تایبەتی بۆ ئەم مەبەستە پێکهێنابوو، کە ئەرکیان بەدواداچوون و دۆزینەوەی ئەو شوێنانە بوو، کە گومانی قومارکردنیان لێدەکرا.

ئەحمەد رەمەزان، وتەبێژی پۆلیسی زاخۆ، لە لێدوانێکدا بۆ 964 وتی، “هەڵمەتەکە تەنیا داخستنی شوێنەکانی قومارى نەگرتەوە، بەڵکو خاوەنەکانیشیان رووبەڕووی دادگا کرانەوە و بەپێی ماددەی 389 لە یاسای سزادانی عێراقی، سزای یاسایی و ماددی دران”.

جەختی لەسەر گرنگیی هاوکاریی هاوڵاتیان کردەوە و وتی، “داوا لە هاوڵاتیان دەکەین ئەگەر هەر شوێنێک یان کەسێکیان بینی کە قومار دەکات، یەکسەر پۆلیسی زاخۆ ئاگادار بکەنەوە، ئێمەش بەپێی رێنمایی و رێکارەکانمان، شوێنەکە دادەخەین.”

لەبارەى ژمارەى ئەو قومارخانانەى داخراون، ئەحمەد رەمەزان باسى لەوەکرد، داخستنەکە ئیشى 18 مانگە و ژمارەى تەواوەتیان لانییە، بەڵام هیچ شوێنێک نەماوە کە قومارى تێدا بکرێت.

پێداچوونەوە: وریا فەتاح