کانێسکانی سلێمانی بەرگی فۆلکلۆر دەپۆشێت

964+

دیلان محەمەد – سلێمانی

بەنۆژەنکردنەوەی چەند بینایەک و پێدانی سیمای کۆنی بیناسازیی سلێمانی پێیان، بەشێک لەگەڕەکی کانێسکانی شاری سلێمانی نۆژەن دەکرێتەوە و دەبێتە گەڕەکێکی گەشتیاری.

پڕۆژەکە لەلایەن سەرمایەداری شاری سلێمانی زاهیری کەریمەڕەشەوە ئەنجام دەدرێت و لەئێستادا کارەکانی لەکۆتایی نزیک بووەتەوە.

نۆژەنکردنەوەکە بە بڕیاری ئەنجومەنی شارەوانی سلێمانی دەبێت بیناکان لەدوو نهۆم زیاتر نەبن، چونکە لەکۆندا خانووەکانی سلێمانی دوو نهۆم بوون.

زاهیری کەریمەڕەش، جێبەجێکاری پڕۆژەکە بەتۆڕی964ی راگەیاند: لەئێستادا ھەشت لەبیناکان تەواو بوون و نزیکەی هەشت بینای دیکەش کاریان لەسەرە.

لەگەڕەکەکەدا چەند سەکۆیەک دروست دەکرێن بۆ ئەوەی هەرکەس بیەوێت بتوانێت میوزیکی تیادا بژەنێت یان نماییشی تێدا بکات و چەند پەیکەرێکی ژن و پیاوی کوردی لەسەر شێوازی کۆن تیادا دروست دەکرێت.

“ھەوڵ دەدرێت بکرێتە شوێنێک ژیانی شەوی تیادا بێت و تەواوکەری بەردەم مزگەوتی گەورە و سەھۆڵەکە بێت”، زاهیری کەریمەڕەش وای وت.

گەڕەکی کانی ئاسکان یان کانێسکان یەکێکە لە گەڕەکە کۆنەکانی سلێمانی. پێش بوونیادنانی شاری سلێمانی ناوچەیەکی چڕ بووە بە دارودرەخت و سەوزایی و ئاوی لێ بووە، بەردەوام ئاسک لەو ناوچەیە بینراوە کە لە چیای ئەزمەڕ و دەوروبەری سلێمانی هاتوونەتە خوارەوە لەو ناوچەیە ئاویان خواردووەتەوە.

پێداچوونەوەی: پێشەوا محەمەد