بۆ سێ قۆناغی خوێندن ئەپلیکەیشنی قوتابخانەکەم کارا کرا

ئەحمەد مستەفا

وەزارەتی پەروەردەی هەرێم، ئەپڵیكەشنێكی نوێی بەناوی “قوتابخانەكەم” راگەیاند، كە تایبەتە بە پۆلەكانی یەكەم و دووەم و سێیەمی بنەڕەتی و تێیدا بۆ خوێندن و فێربوونی قوتابییان سوود لە زیرەكی دەستكرد وەرگیراوە.

سێیەمین کۆڕبەندی پەروەردەیی بە بەشداریی وەزیرانی پەروەردەی عێراق و هەرێمی کوردستان و چەند وەزیرێکی دیکەی حکومەت و مامۆستایان و پسپۆڕانی پەروەردەیی لە شاری هەولێر بەڕێوەدەچێ، ئامانجی کۆڕبەندەکە کەڵک وەرگرتن بوو لە تەکنەلۆجیا و زیرەکیی دەستکرد لە پرۆسەی پەروەردە و فێرکردندا.

وەزارەتی پەروەردە لە كۆڕبەندەكەدا پرۆژەی “قوتابخانەکەم”، راگەیاند کە پلاتفۆڕمێکی دیجیتاڵییە بۆ فێرکردن بۆ پۆلی یەکەم، دووەم و سێیەم کە تێیدا سوود لە زیرەکیی دەستکرد “AI” وەرگیراوە، ئەمەش ئاماژەی گرنگیدانی وەزارەتی پەروەردەی حکومەتی هەرێمی کوردستانە بە سوودوەرگرتن لە بواری پێشکەوتنی تەکنەلۆجیا و زیرەکیی دەستکرد لە پرۆسەی پەروەردە و فێرکردندا.

لەبارەی ئەپڵیكەیشنی قوتابخانەكەم، زوهێر محەمەد یاریدەدەری بەڕێوەبەری گشتیی پلاندانانی پەروەردەیی رایگەیاند، پرۆژەی قوتابخانەکەم چەندین ڤیدیۆ و چالاکی هەموو وانەکانی خوێندنی پۆلی یەکەم، دووەم و سێیەمی بنەڕەتی تێدایە، تێکەڵکردنی زیرەکیی دەستکردە و لە قوتابخانەکان سوودی لێوەردەگیرێت.