15 کەس لە لێواری مەرگ رزگار کران

964+

ئاکام غەفور- سۆران

هەرچەندە لە سێ رۆژی رابردوودا 10 هاوڵاتی لە چەند شوێنێكی كوردستان خنكاون، بەڵام هەواڵی دڵخۆشكەریش هەیە، كە لە سنوری ئیدارەی سۆران ئەمساڵ 15 هاوڵاتی لە خنکان رزگار کراون و بەرگریی شارستانی و تیمەكانی مەلەوانی كەمتەرخەم نەبوون لە یارمەتیدانی هاوڵاتیان و گەشتیاران.

بە قسەی رەوەند هاودیانی، وتەبێژی بەرگریی شارستانی سۆران بۆ 964 ، هاوڵاتیان رەچاوی مەرجەکانی سەلامەتی ناکەن، بۆیە رێژەی خنکان لە رووبارەکاندا زۆر بووە، بەشی زۆری ئەوانەشی خنکاون تەمەنیان لە نێوان 20 بۆ 25 ساڵە و گەشتیار بوونە، لەگەڵ ئەوەشدا ئەم هاوینە 15 کەس لە سنوورەکەیان لە ناو ئاو رزگار کراون، کە مەترسی لەسەر گیانیان هەبووە، بەشی زۆری رزگارکردنەکانیش لە رووباری گەلی عەلی بەگ بوون.

لە سنووری ئیدارەی سەربەخۆی سۆران، زیاتر لە هەزار کیلۆمەتر پانتایی رووبار هەیە، ناوچەیەکی گەشتیاریشە، بەرگریی شارستانی سۆرانیش دەڵێن، ناتوانن لەهەموو شوێنەکان تیمی جێگیر دابنێن بۆ رزگارکردنی خەڵک، بەڵام ئەو شوێنانەی کە خەڵک مەلەوانی لێ دەکەن، رۆژانە تیمی گەڕۆک سەردانیان دەکەن و رێنماییان دەكەن.

هەر لەو سنوورەدا ساڵی رابردوو 15 کەس لە ئاودا خنکاون و زیاتر لە 25 کەسیش رزگار کراون.

پێداچوونەوە: ئەرسەلان عەبدوڵا