لەسەرەتاى ئەمساڵەوە تورکیا زیاتر لە 1600 هێرشى بۆسەر هەرێمى کوردستان ئەنجامداوە

وریا فەتاح

لە شەش مانگى یەکەمى ئەمساڵدا، سوپاى تورکیا زیاتر لە 1600 هێرشى بۆسەر هەرێمى کوردستان ئەنجامداوە و نۆ هاوڵاتى مەدەنیش بەرکەوتوون.

بەپێی راپۆرتێکی تیمی کوردستانی عێراقی رێکخراوی CPTـى ئەمریکی، لە ماوەی شەش مانگی یەکەمی ئەمساڵدا، لە 1ـى کانوونی دووەم تا 30ـى حوزەیران، سوپای تورکیا 1,678 هێرش و بۆردوومانی بۆ سەر خاکی هەرێمی کوردستان ئەنجامداوە.

زۆرینەی هێرشەکان، کە دەکاتە 1,484 هێرش، لە سنووری پارێزگای دهۆک بوون. هەروەها 140 هێرش کراوەتە سەر سنووری پارێزگای هەولێر و 54 هێرشیش لە سنووری پارێزگای سلێمانی تۆمارکراوە.

راپۆرتەکە ئاماژەی بەوەشکردووە کە لە ئەنجامی ئەو هێرش و بۆردوومانانەدا، 3 هاووڵاتی گیانیان بەخشیوە و 6ـى دیکەش برینداربوون.

شێوازی هێرشەکانیش بەم جۆرە بوون:

1,232 هێرش لە رێگەی تۆپبارانەوە.
397 هێرش لە رێگەی فڕۆکەی جەنگی و فڕۆکەی بێفڕۆکەوانەوە.
43 هێرش لە رێگەی هەلیکۆپتەرەوە.
5 هێرش لە رێگەی بەکارهێنانی چەکی سووکەوە.
1 هێرش لە رێگەی تەقینەوە.
هەروەها، بە تەنیا لە مانگی حوزەیراندا، 550 هێرش ئەنجامدراوە، کە 541یان بۆ سەر سنووری پارێزگای دهۆک و 9یان بۆ سەر سنووری پارێزگای هەولێر بوون.

بەپێی راپۆرتەکە، ژمارەی هێرشەکان لە مانگی حوزەیراندا بە بەراورد بە مانگی ئایار بە رێژەی 8% زیادیانکردووە..

کامەران عوسمان رێکخەرى تیمى کوردستانى رێکخراوەکە بە 964ـى وت،” لە دوای راگەیاندنی ئاگربەستی یەکلایەنەی پەکەکە لە مانگی ئادار، سوپای تورکیا هیچ هێرش و بۆردوومانێکی بۆ سەر سنووری پارێزگای سلێمانی ئەنجامنەداوە”.

بڕیارە سبەینێ هەینى 11.7.2025، ژمارەیەک لە گەریلاکانى پەکەکە لە سنوورى پارێزگاى سلێمانى و بەدیاریکراوى لە سنوورى پشدەر، بەشێوەیەکى سیمبوڵى چەک دابنێن.

بۆ خوێندنەوەى راپۆرتەکە کلیک بکە…