لەدوێنێوە دارستانی ناحیەی زاویتە دەسووتێت و ئاگرەکە کۆنتڕۆڵ ناکرێت

964+

هیڤی دێوالی – دهۆک

زیاتر لە 23 کاتژمێرە ئاگر لە دارستانی ناحیەی زاویتە کەوتووەتەوە،  وتەبێژی بەرگری شارستانیش دەڵێت، زیاتر لە  200 دۆنم پوش و پاوەن و دار سنەوبەر سووتاوە.

لە دوێنێ پێنج شەممە 2025.7.4، کاتژمێر 3:00ـی دوای نیوەڕۆوە، بەهوکارێکی نادیار ئاگر لەدارستان و شاخی چیای زاویتە کەوتووەتەوە، لەو کاتەشەوە،  تیمەکانی ئاگرکۆژێنەوە بەهەماهەنگی پێشەمەرگەی ژینگە، پۆلیسی ژینگەی پارێزگای دهۆک و بەشێک لەدانیشتووانی ناحیەی زاویتە هەوڵی کونترۆڵکردنی ئاگرەکە دەدەن، بەڵام تا ئێستا بەردەوامە و کونترۆڵنەکراوە.

عەبدولستار عەبدولحەمید، وتەبێژی هێزی پێشمەرگەی پاراستنی ژینگە لە دهۆک بە 964ـی وت، هەوڵێکی زۆرمانداوە بۆ کونترۆڵکردنی، بەڵام تا ئێستا ئاگر لە هەندێک بەشی دارستانەکە ماوە و کونترۆڵنەکراوە.

وتیشی، شەوی رابردوو 95%ی ئاگرەکە کونترۆڵکرا، بەڵام بەهۆی رەشەبای بەهێزەوە بەیانی ئەمڕۆ دووبارە ئاگر لە سنەوبەرەکانی دارستانی ناحیەی زاویتە کەوتووەتەوە و بەشێکی زۆری داری سروشتی و داری سنەوبەر و پووش پاوان سووتاون و بەشێک لە ئاژەڵەکانیش تەنگەنەفەس بوون.

بێوار عەبدولعەزیز، وتەبێژی بەرگری شارستانی پاڕێزگای دهۆکیش بە 964ـی راگەیاند، لەدوێنێوە  ئاگر لە دارستان و شاخی ناحیەی زاویتە کەوتەوە و  دەسووتێت، و حەوت تیمی ئاگرکوژێنەوە بە بەردەوامی کاردەکەن بۆ کوژاندنەوەی ئاگرەکە و تا ئێستا کونترۆڵکراوە.

وتیشی، زیاتر لە 200 دۆنم پووش و پەلاش و بەشێکی زۆر دار سنەوبەر سووتاون و زیانێکی  زۆر بە دارستانەکە کەوتووە.

ناحیەی زاویتە بە داری کاژ و سنەوبەر بەناوبانگە، دەکەوێتە قەزای دهۆک لەسنووری پارێزگای دهۆک.

پێداچوونەوە: ژێوار خدر

لەسەر ئاگرەكەی رەشانكێ چوار كەس دەستگیر كران