وێنەی دەستگیرکراوەکە و پارە ساختەکانی. فۆتۆ/پۆلیسی هەولێر
دۆلارە ساختەکانی هەولێر دۆزرانەوە
964+
هاوبەش ئەبوبەکر
لە هەولێر کەسێک لەسەر ساختەکردنی پارە و مامەڵەکردن بە پارەی ساختە دەستگیرکرا، پۆلیسی هەولێر دەڵێت تۆمەتبارەکە خەڵکی ئێرانە و شوێنی نیشتەجێبوونی تورکیایە.
ئەمڕۆ هەینی 17.2.2023، پۆلیسی هەولێر لە راگەیەندراوێکدا وتی، کەسێک دەستگیرکرا کە بڕی 12 هەزار دۆلاری ساختەی پێبووە.
“دەست بەسەر سەرجەم پارەکاندا گیرا و پەڕاوی لێکۆڵینەوەی بۆ رێکخرا و بە مەبەستی گرتنەبەری رێکاری یاسایی رەوانەی دادگای لێکۆڵینەوەی هەولێر کرا،” پۆلیسی هەولێر وا دەڵێت.
رۆژی 12.2.2023، وەزارەتی دارایی و ئابووری هەرێمی کوردستان رایگەیاند، ماوەیەكە بڵاوبوونەوەی دراوی ساختە لە بازاڕەکانی هەرێمی کوردستان زیادیکردووە و داواشی کرد هاوڵاتیان زیاتر چاو کراوە بن لەکاتی مامەڵەکردن بەجۆرەکانی دراو تا تووشی زیان نەبن.
بڕیاریشە خولی هۆشیاری بۆ فەرمانگەکان و نوسینگە و کۆمپانیاکانی ئاڵوگۆڕی دراو بکرێتەوە تا هەمووان زیاتر بەئاگا بن لە بڵاوبوونەوەی دراوی ساختە و مەترسییەکانی.