راو کرابوو
ئەو ئاسکەی سێ کەسی بەگرتن دا گەڕێندرایەوە بۆ نێو سروشت
964+
ژووری هەواڵ
چەند رۆژێک بەر لە ئێستا، لە دەربەندیخان ئاسکێک لە دەستی سێ راوچی رزگارکرا و دوێنێ گەڕێندرایەوە بۆ نێو سروشت، پۆلیسیش دەڵێت، ئاسکەکە بریندار کرابوو.
راوچییەکان بەنیازبوون ئاسکەکە بفرۆشن، بەڵام پێش مشتەری، پۆلیسی دارستان و ژینگەی دەربەندیخان گەیشتووەتە سەریان و ئاسکەکەیان رزگار کردووە.
ئەمڕۆ چوارشەممە 11.6.2025، هێمن کەمەرخان، وتەبێژی پۆلیسی دارستان و ژینگەی سلێمانی بە 964ـی راگەیاند، سێ کەسیان لەسەر راوکردن و بریندارکردنی ئاسکەکە دەستگیر کردووە.
“بەهۆی برینداری ئاژەڵەکەوە هەرزوو خرایە ژێر چارەسەریی پزیشکی ڤێتەرنەری بۆ ماوەی دوو هەفتە، بەردەوامیش لەلایەن کارمەندانی بەشی دەربەندیخان چاودێری و خزمەت دەکرا تا تەواو دڵنیابوون لە چاکبوونەوەی”، پۆلیسی دارستان و ژینگەی سلێمانی وا دەڵێت.
