مۆنۆمێنتی هەڵەبجە - وێنە: 964
19ـیەمین پارێزگای عێراق
یاسای بەپارێزگابوونی هەڵەبجە لە رۆژنامەی وەقایعی عێراق بڵاوکرایەوە
964+
ژووری هەواڵ
یاسای بەپارێزگابوونی هەڵەبجە لە رۆژنامەی وەقایعی عێراق بڵاوکرایەوە و بەمەش هەڵەبجە بەفەرمی دەبێتە چوارەمین پارێزگای هەرێمی کوردستان و 19ـەیەمین پارێزگای عێراق.
ئەمڕۆ دووشەممە 5.5.2025، خالید شوانی، وەزیری دادی عێراق لە کۆنفرانسێکی رۆژنامەوانیدا رایگەیاند، پڕۆژە یاسای بەپارێزگابوونی هەڵەبجە لە رۆژنامەی وەقایعی عێراق بڵاوکرایەوە و هیچ سکاڵا و تانەیەک نابێتە رێگر لەبەردەم جێبەجێکردنی یاساکە.
“لە ئەمڕۆوە یاسای بەپارێزگاکردنی هەڵەبجە دەچێتە بواری جێبەجێکردنەوە و پارێزگای هەڵەبجە بە یاسایی و بە فەرمی ناسێندرا”، وەزیری داد وای وت.
لەدوای بڵاوکردنەوەی یاساکە لە رۆژنامەی وەقایعی عێراق، بڕیارە جارێکی دیکە یاساکە بنێردرێتەوە بۆ سەرۆکایەتی کۆمار و دەبێت مەرسومی کۆماری بۆ دەربچێت.
رۆژی 14.4.2025، پەرلەمانی عێراق دوای چەندین جار دواخستن، بە زۆرینەی دەنگ، پڕۆژەیاسای بە پارێزگابوونی هەڵەبجەی کردە یاسا و بە فەرمی وەک 19 یەمین پارێزگای عێراق ناساندی.
