دوو قوتابی قوتابخانەی لیدەرس
براندێکی خواردنەوەی سرووشتی تایبەت بە خۆیان بەرهەمدەهێنن
964+
ئەمەل ناجی- هەڵەبجە
ئاریا و ئەحمەد دوو قوتابی قۆناغی بنەڕەتین و لە چەند جۆرێک لە گوڵ و گیای سرووشتی، براندێکی تایبەتی خواردنەوەی سرووشتیان درووستکردووە، بە ناوی (لیدەرس نۆش) ئەمڕۆ لە فیستیڤاڵی ساڵانەی قوتابخانەکەیان نمایشیان کرد و پێشکەشی میوانانی فیستیڤاڵەکەیان کرد.
دەربارەی خواردنەوەکەیان ئەحمەد و ئاریا بە 964یان وت، ”خواردنەوەکە بە شێوەی کیسەی چای بچووکە و لە گوڵی بەیبوون، گوڵی محەمەدی و گیای هەزبێلە درووستکراوە، بە دەستی خۆمان لە ناوچەکە کۆمانکردۆتەوە، ماوەی دوو هەفتەیە سەرقاڵی ئامادەکردنین و ئەمڕۆش لەم فیستیڤاڵەدا نمایشمان کردووە و ئەگەر کڕیاری زۆری هەبێت نیازمانە بیخەینە بازاڕەوە”.
بە وتەی خوێندکارەکان، خواردنەوەکەیان هەر وەک چای ئاسایی ئامادە دەکرێت و هەوڵیان داوە سوود لەو گوڵ و گیایانە وەربگرن کە سوودی تەندرووستی و ئابووریشیان هەیە، لە ناوچەکەشدا بە ئاسانی دەستدەکەون.
پێداچوونەوە: ژێوار خدر
