كەركوک شانەی قەیرانەكانی پێكهێنا

964+

كاروان ساڵحی – كەركوک

شانەی قەیرانەكان لە پارێزگای كەركوک پێكهێنرا، لە یەكەم كۆبوونەوەشدا چەند بڕیارێكی دەركرد.

هیبە ئەکرم بەرپرسی راگەیاندنی ڤێتێرنەری کەرکوک، ئەمڕۆ یەكشەممە 27.4.2025 ی بە964 ی وت، شانەی قەیرانەكان بە سەرپەرشتی پارێزگاری کەرکوک پێک هێنرا و لە یەکەم کۆبوونەوەیدا بڕیاری ئەوەی دا، رێگری لە چوونە ژوورەوە و دەرچوونی ئاژەڵان بكرێت، رێگری لە جووڵەی ئاژەڵان بۆ پارێزگاکان و گەڕانەوە بكرێت.

هەروەها ئاماژەی بەوە دا، بڕیاردرا سەربڕینی هەڕەمەکی ئاژەڵان رێگری لێ بكرێت و بەخێوکردنی ئاژەڵ لە ناوچەی نیشتەجێبوون قەدەغەیە، لەگەڵ داخستن و لێپرسینەوە لە دوکانەکانی گۆشتفرۆشیی بێ مۆڵەت، کە مەرجە تەندروستییەکان جێبەجێ ناکەن.

لە بڕیارەكانی دیكەی شانەكە، چڕکردنەوەی رشاندن و قڕکردن و چاودێریکردنی پەتای تای خوێنبەربوون.

پارێزگای كەركوك یەكێكە لەو شارانەی، كە تای خوێنبەربوونی پێگەیشتووە و تا ئێستا چوار هاوڵاتی، كە یەكێكیان كارمەندی تەندروستی بوو، گیانیان لەدەستداوە، یەكێكیشیان گۆتفرۆش بوو، هەروەها دایكێكی دووگیانیش گیانی سپارد، لەگەڵ ئەوەشدا تووشبوویەك چاكبووەوە و رەوانەی ماڵەوە كرایەوە.

پێداچوونەوە: ئەرسەلان عەبدوڵا