کشتوکاڵی راپەڕین چەند رێنماییەکی بۆ جوتیاران بڵاوکردەوە

964+

ژێوار خدر

کشتوکاڵی راپەڕین بەهۆی کەم بارانی و وشکەساڵییەوە لە ئێستاوە ئاگاداری جوتیارانی بیتوێن و پشدەر دەکاتەوە و چەند رێنماییەک بۆ جوتیاران بڵاودەکاتەوە.

خالید ئەحمەد، بەڕێوەبەری کشتوکاڵی راپەڕین بە 964ـی وت، ئەمساڵ بەگشتی لە هەرێمی کوردستان رێژەی باران بارین زۆر کەم بووە و وشکەساڵییەکی قورس و ناڕەحەت چاوەڕێی جوتیارەکانمان دەکات، ئێمەش لەپێناو رێگری کردن لە درووستبوونی کێشە و گیروگرفتی کۆمەڵایەتی بەتایبەتی لە وەرزی هاویندا لە بەڕێوەبەرایەتییەکەی خۆمانەوە چەند رێنماییەکمان بڵاو کردووەتەوە، کە پێویستە جوتیاران پابەندی بن.

وتیشی، ئەمساڵ رێژەی ئاوی ژێرزەوی و سەرزەویش بەهۆی وشکەساڵییەوە زۆر کەمی کردووە لە سنووری ئیدارەی راپەڕین، تا ئێستا بەرزترین رێژەی باران بارین 311 ملیم و نزمترینیش 227 ملیمە، لە کاتێدا ساڵی پار تا ئەم کاتانە، رێژەکە 800 ملیم بووە لە هەندێک ناوچەی دیارکراو کە ئەمەش چوار بەرابەری ئەمساڵە.

رێنماییەکانی کشتوکاڵی راپەڕین بۆ جوتیاران ئەمانەن:

1.   پێویستە جوتیاران داچاندن کەم بکەنەوە بەتایبەت برنج.

2.  پەرێزەکان دانەچێنن بە بەروبومی هاوینە.

3.  ئەو حەوزی ماسییانەی بەتاڵ بوون ئاویان تێنەکرێتەوە.

4.  لەگەڵ میراوەکان هاوکار و هەماهەنگ بن.

کشتوکاڵی راپەڕین هەنگەوانانی دەڤەرەکە ئاگادار دەکاتەوە