خەڵک شڵەژان
دەنگی تەقینەوەکەی سلێمانی چی بوو؟
+964
دیلان محەمەد جەزا
دەنگە گەورە شاخی ئەزمەڕ تەقاندنەوەی مین بووە دوای کۆکردنەوەی لەلایەن تیمی دەزگای مینی سلێمانییەوە، بەڵام هاوڵاتیان ترساون و زانیارییان نەبووە چی بووە.
، بەڕێوەبەری گشتیی دەزگای مینی سلێمانی موحسین شێخ عەبدولکەریم، بە 964 وت، نیوەڕۆی ئەمڕۆ ژمارەیەک مینیان لە یەکێک لە کێڵگەکانی شاخی ئەزمەڕ تەقاندووەتەوە دوای هەڵگرتنەوەیان.
باسی لەوەش کرد، هەڵمەتی هەڵگرتنەوەی مین و تەقەمەنی لە شاخی ئەزمەڕ بەردەوامی هەیە و هەنگاو بە هەنگاو شاخەکەی لێ پاکدەکرێتەوە.
دەنگی تەقینەوەکە گەورە بووە و چەند هاوڵاتییەكی دەوربەری ئەو شوێنە پەیوەندییان بە پەیامنێری 964 كردووە و وایانزانیوە هێرشی درۆن و مووشەك بووە.
هەرچەندە بەپێی زانیارییەكانی 964، دەزگای مینی سلێمانی دانیشتووانی پڕۆژەی بەرزاییەكانی قەیوانیان ئاگادار كردبووەوە كە كاری تەقینەوەی مین دەكەن، بەڵام دانیشتووانی دەوروبەری بناری ئەزمڕ و گەڕەكی ئیبراهیم ئەحمەدیان ئاگادار نەكردبووەوە.
دوێنێ لە ئیدارەی سەربەخۆی سۆرانیش بە هەمان شێوە مین تەقێندرایەوە، بەڵام رۆژێك زووتر خەڵكی ناوچەكەیان ئاگادار كردەوە.
پێداچوونەوە: ئەرسەلان عەبدوڵا
