پارێزەر ئازاد دۆسکی
لە بەغدا
یەكەم دانیشتنی سكاڵای پارێزەرێكی كورد دژ بە دادگای فیدڕاڵی عێراق بەڕێوەچوو
964+
محەمەد فاتیح
ئەمڕۆ یەكەم دانیشتنی دادگای فیدڕاڵی سەبارەت بە پشكی بودجەی هەرێمی كوردستان لە بەغدا بەڕێوەچوو، كە پارێزەرێكی كوردی خەڵكی هەرێم سكاڵاكەی جوڵاندووە و داوای كردووە پشكی بودجەی هەرێم پارێزراوبێت.
ئازاد دۆسكی، پارێزەر و راوێژكاری دەستووری، ئەم بابەتەی بۆ 964 ئاشكرا كرد و دەڵێت، سكاڵای لەسەر دادگای فیدڕاڵی تۆمار كردووە سەبارەت بە دابیننەكردنی پشكی بودجەی هەرێمی كوردستان و ئەمڕۆ یەكەم دانیشتنی سكاڵاكە لە هەمان دادگا لە بەغدا بەڕێوەچوو.
بەپێی دەستووری عێراق، مافی هەموو هاوڵاتیان لە سەرتاسەری عێراق بە هەرێمی كوردستانیشەوە یەكسانە و دەبێت پارێزراوبێت، بەپێی مادەی 89ی دەستوور پێویستە دەسەڵاتدارانی عێراق و دادگای فیدڕاڵی پارێزەری ماڵ و موڵكی گشتیی بن و سیستمی دیموكراتی بپارێزن، ئازاد دۆسكی واى وت.
دەشڵێت، دەبێت له بری نەوتی هەناردەكراوی هەرێمی كوردستان، پشكی هەرێم دیاریی بكرێت و هەژماری بانكی لە بانكی ناوەندی عێراق لەلایەن وەزارەتی دارایی فیدڕاڵ بۆ هەرێم بكرێتەوە، هەروەها بەپێی مادەی 121ى دەستووری عێراق، پشكی بودجەی هەرێمی كوردستان لە بودجەی گشتیی عێراق جێگیركراوە و دەسەڵاتدارانی عێراق و دادگای فیدڕاڵی بەرپرسیارن لە دابینكردنی پشكی بودجەی هەرێمی كوردستان.
بەهۆی دابیننەكردنی پشكی بودجەی هەرێمی كوردستان لە بودجەی گشتیی عێراق و راگرتنی هەناردەكردنی نەوتی هەرێم لەلایەن حكومەتی فیدڕاڵییەوە، فەرمانبەرانی هەرێمی كوردستان كێشەیان بۆ دروست بووە و هاوشێوەی فەرمانبەرانی عێراق موچەكانیان پارێزراو نییە و مانگانە لە كاتی خۆیدا وەری ناگرن.
