دووانیان کوڕ و باوکن
ئەو چوار کەسەى لە هەولێر هەڵیانکوتایە سەرماڵێک دەستگیرکران
964+
وریا فەتاح
بەڕێوەبەرایەتی پۆلیسی پارێزگای هەولێر، چوار تۆمەتباری بە تۆمەتی تەقەکردن و هەڕەشەکردن و جنێودان و هەڵکوتانە سەر ماڵێک دەستگیر کرد.
پۆلیسى هەولێر بڵاوى کردەوە، ئەو تۆمەتبارانە، کە دووانیان کوڕ و باوکن و خەڵکی سنووری قەزای خەباتن، لەسەر کێشەیەکی کۆمەڵایەتی هەڵیانکوتابووە سەر ماڵێک لە شاری هەولێر، بۆیە دوای تۆمارکردنی سکاڵا، لە ئۆپەراسیۆنێکی تایبەتدا بە بڕیاری دادوەری لێکۆڵینەوە، تۆمەتباران دەستگیر کران و رادەستی دادگا کران.
بەپێى ئەو گرتە ڤیدیۆیە بێت کە پۆلیس بڵاوى کردووەتەوە، تۆمەتباران بە ئاشکرا و بێ ترس تەقە دەکەن و بەلەقە لە دەرگاى ئەو ماڵە دەدەن و لە ناو کۆڵانێکى قەرەباڵغ تەقە دەکەن.
” لەکاتی بوونی هەر گرفت و کێشەیەکدا هاووڵاتیان هەرگیز پەنا نەبەنە بەر توندوتیژی و پۆلیس ئاگادار بکەنەوە”، پۆلیسى هەولێر وادەڵێت.
جەختیش دەکاتەوە، هەرکەسێک سەرپێچیی یاسا بکات، رووبەڕووی دادگا دەکرێتەوە.
