تیمێكی كارەبا لە سلێمانی. بەڕێوەبەرایەتی كارەبای سلێمانی
"پڕۆژەی رووناكی"
كارەبای 24 سەعاتی گەیشتە یەکەمین گەڕەکی شاری سلێمانی
964+
ئەرسەلان عەبدوڵا
وەزارەتی كارەبای هەرێمی كوردستان رایگەیاند، وەک قۆناغێکی ئەزموونی، لە رێگای پڕۆژەی رووناکی کارەبای نیشتمانیی 24 کاتژمێری بۆ بازاڕی سلێمانی و بەشێک لە گەڕەکەکانی شارەكە دابین دەكات.
وەزارەتەكە ئەمشەو لە راگەیاندراوێكدا ئاشكرای كرد، لە رێگای پڕۆژەی رووناکی کارەبای نیشتمانی 24 کاتژمێری بۆ بازاڕی سلێمانی و بەشێک لە گەڕەکەکانی سلێمانی لەوانە (ئیبراهیم پاشا، سابونکەران، دارۆغا، حاجی حان، مەولەوی، جادەی ئۆرزی، سەلیم بەگ و خانەقا) دابین دەكات، کە زیاتر لە 9,000 هەزار هاوبەشی کارەبای لەخۆگرتووە.
“ئەم هەنگاوە دوای ئەوە دێت کە پێشتر 17 گەڕەکی شاری هەولێر کارەبای 24 کاتژمێرییان لەلایەن پڕۆژەی رووناکی بۆ دابینکراوە و بەمشێوەیە بەکۆی گشتی نزیکەی 100 هەزار هاوبەش سوودمەند دەبن لەم خزمەتگوزارییە لەسەرانسەری هەرێمی کوردستاندا”، وەزارەتی كارەبا وادەڵێت.
هەروەها ئەوەش دەخەنەڕوو، پڕۆژەی رووناکی لە چالاکییەکانی بەردەوامە و بەمزووانە کارەبای 24 کاتژمێری بۆ کۆمەلێک گەڕەکی دیکە لە شارەكانی هەرێمی کوردستان دابین دەکات و پلان وایە تا کۆتایی ساڵی 2026 کارەبای سەرانسەری هەرێمی کوردستان دەبێتە 24 کاتژمێری.
وەزارەتی كارەبا داوا لە هاوڵاتیان دەكات، بۆ زانیاری زیاتر، دەتوانن پەیوەندی بکەن بە سەنتەری خزمەتگوزاری پڕۆژەی رووناکی لە رێگەی ژمارە 1992. سەنتەرەکە لە کاتژمێر 9ی بەیانی تاوەکو 9ی شەو بەردەستە.
كارەبای 24 كاتژمێری بۆ ژمارەیەك لە گەڕەكەكانی هەولێر دابین كراوە، پێشوازییش لە پڕۆژەكە دوو ئاراستەی جیاوازی هەیە، هەندێك لە هاوڵاتیان پێیان باشە و دەڵێن لە دانی دوو بەشە پارەی مانگانە و دووكەڵی مۆلیدە ئەهلییەكان رزگاریان بووە، بەڵام هەندێكی دیكە پێیان وایە ئەو پارەیەی مانگانە حكومەت بۆ ئەو كارەبایە لە هاوڵاتیان وەریدەگرێت، زۆر زۆرە و لە توانای هەموو ماڵێكدا نییە، بە جۆرێك هاوبەش هەبووە 400 هەزار دیناری بۆ هاتووەتەوە.
بەڕێوەبەری پێشووی كارەبای سلێمانی ئازاد كرا و تانكەرێكی نەوتیش سووتا
