964 لەگەڵ نەوژین و نەدا
نەیزانیوە هاوسەرەکەی بەرشەلۆنەیە و گۆرانیشی بۆ دەڵێت
964+
پەری ساڵح
نەوژین خالید موزیسیانە رۆمانسیەکەی هەولێر و هاوژینەکەی نەدا بەردەوام باس لە وەرزش و خواردنی تەندروست دەکەن لە سۆشیال میدیا، ئێمەش وەکو تیمی 964 رۆژێک لە کاتی وەرزشکردن چووینە لایان، تا بزانین لەگەڵ وەرزش و هونەر هەواڵیان چۆنە و بەنیازی چین و چۆن رێنمایی ئەو کەسانە دەکەن کە وەرزش ناکەن.
بەبیرتان دێت لە وانەکانی قوتابخانە خۆشترین وانە وەرزش و هونەر بوو، هەربۆیە بیرمان کردووە لەیەک پڕۆگرامدا هەردووکیتان بۆ کۆبکەینەوە، یەکەم میوانمان نەوژین و هاوژینەکەی بوو، باسیان لەوەکرد رۆژانە بەیانیان وەرزش دەکەن و لە ماڵەوە لە خواردنی چەور و سوێر و شەکر دوورکەوتوونەتەوە، وەک نەوژین دەڵێت، وەرزش خۆشنیە، بەڵام نەیکەیت ماڵت وێرانە و بۆ تەندروستی زۆر گرنگە.
جا باسەکە هەر وەرزش و خواردنی تەندروست نەبوو، وتیان جار جار دۆڵمە و خواردنە چەورەکانیش خۆشە بەتایبەت ئەگەر دایکیان بێت، ناکرێت گەندەڵی تێدابێ.
ئەوەی جێگای سەرنج بوو بۆ 964، لەناو هۆڵە وەرزشیکە موزیکێکی خۆش بۆ وەرزشکارەکان لێدەدرا تایبەت بە خۆیان، پرسیمان و کاپتن پێی وتین، ئەو موزیکە نەوژین خۆی دایناوە و کاری لەسەر کردووە.
