هۆڵى نەشتەرگەرى لە نەخۆشخانەی ڕاپەرینی فێرکاری لە هەولێر کرایەوە
هەولێر
هۆڵى نەشتەرگەرى لە نەخۆشخانەی راپەرینی فێرکاری بۆ منداڵان كرایەوە
964+
ئەرسەلان عەبدوڵا
لە هەولێر هۆڵی نەشتەرگەری لە نەخۆشخانەی راپەڕینی منداڵان كرایەوە، هەروەها یەکەى برینکارى دواى نۆژەنکردنەوەى دووبارە كرایەوە.
ئەمڕۆ دووشەممە 2025.3.3، هۆڵى نەشتەرگەرى لە نەخۆشخانەی راپەرینی فێرکاری بۆ منداڵان و یەکەى برینکارى دواى نۆژەنکردنەوەى کرایەوە.
پڕۆژەکە پێکهاتووە لە نۆژەنکردنەوەى تەواوی یەکەی برینکاری ( ژوورەکانی داخلبوونی نەخۆش) بە گۆڕینی دەرگا و پەنجەرە و بۆیەکردنی تەواوی ژوورەکان و هۆڵەکانی نەشتەرگەری و ڕووپۆشکردنی زەوییەکەی بە “ڤینیل” و چاكکردنەوەی کارەبا و سیستمی ئۆکسجین و هەواگۆڕکێی هۆڵەکان، هەروەها زیادکردنی هۆڵێکی نەشتەرگەری و دروستکردنی دوو ژوور بۆ پزیشکان و پەرستاران.
راگەیاندنی پارێزگای هەولێر بڵاویكردەوە، ئەو كارانەی لەو نەخۆشخانەیە كراون، بە 90 ملیۆن دینار لەسەر بودجەى پارێزگارى هەولێر ئەنجامدراون.
هاوكات لە رێوڕەسمی كردنەوەی هۆڵەكە و یەکەى برینکارى، پارێزگاری هەولێر و بەڕێوەبەری گشتیی تەندروستی هەولێر ئامادەبوون و جەخت لە خزمەتکردنى زیاترى هاوڵاتیانی شاری هەولێر و باشترکردنى رەوشى نەخۆشخانە گشتییەکان و کەرتى تەندروستى کرایەوە.
