سەرما پشووی پێڕاگەیاندن
سبەینێ هیچ قوتابخانەیەکی باتیفا دەوامی نابێت
964+
شڤان عەبدوڵا – زاخۆ
بەهۆی نزمبوونەوەی زۆری پلەکانی گەرماوە قایمقامیەتی قەزای باتیفای زاخۆ بڕیاری دا سبەینێ 25.2.2025 لە سەرجەم ناوەندەکانی خوێندنی بکرێتە پشوو.
فەرهاد مەحمود، قایمقامی قەزای باتیفا بە 964ـی وت، ” کەش زۆر ساردە و لەبەر تەندروستی قوتابیان و روونەدانی رووداوی نەخوازراو پشوویان بۆ پەروەردە راگەیاندووە و رۆژانی داهاتووش بڕیار لەسەر فەرمانگەکان دەدەن ئەگەر پێویست بێت.
وتیشی، ئەمڕۆ قوتابخانەیەک و باخچەیەکی ساوایان بەهۆی سەرماوە ئاوەکەیان بەستبووی و بێ ئاو بوون، بۆیە پێویست ناکات سبەینێ منداڵەکانیان بنێرنە قوتابخانە.
قەزای باتیفا لە رۆژهەڵاتەوە نزیکەی 30 کیلۆمەتر لە سەنتەری شاری زاخۆوە دوورە، ناوچەیەکی شاخاوییە و لەم زستانەدا دوو جار بەفری لێ باریوە.
پێداچوونەوە: توانا نەقی
