بەفر و بەستەڵەک ئاستەنگی هاتوچۆی لە رێگاکانی سۆران دروست کردووە - وێنە: بەڕێوەبەرایەتی چاککردنەوە و پاراستنی رێگاوبانی سۆران
زنجیر ببەستن بۆ ئەوەی تووشی کارەسات نەبن
شەختە و بەستەڵەک ئاستەنگی هاتوچۆی لە رێگاکانی سۆران دروست کردووە
964+
شۆڕش قادری
بەهۆی بەفربارین و سەرما و سۆڵەوە، بەستەڵەک لە چەند رێگایەکی ئیدارەی سۆران دروست بووە و ئاستەنگی هاتوچۆی دروست کردووە، بۆیە شۆفێران وریا بن و بەبێ زنجیر خۆ لەو رێگایانە مەدەن، بۆ ئەوەی بەدوور بن لە رووداوەکانی هاتوچۆ.
خۆسرەت سادق بەڕێوەبەری چاککردنەوە و پاراستنی رێگاوبانی سۆران بە 964ـی وت، “بەهۆی بەفربارین و سەرمای شەوی رابردوو، شەختە و بەستەڵەک لە رێگای دەروازەی نێودەوڵەتی حاجی ئۆمەران و زینی وەرتێ دروست بووە و ئاستەنگی هاتوچۆی دروست کردووە”.
“لە بەیانی زووەوە تیمەکانمان سەرقاڵی پڕژاندنی خوێ بە جادەکانن و تا چەند کاتژمێرێکی تر بەستەڵەکی رێگاکە دەتوێتەوە و هاتوچۆ لە رێگاکان ئاسایی دەبێتەوە”، خۆسرەت سادق وای وت.
داوایشی لە شۆفێران کرد، لەم کاتەدا و لە وەرزی سەرمادا هەمیشە زنجیریان پێ بێت، بۆ ئەوەی کە رێیان کەوتە ئەو جۆرە شوێنانە، پەکیان نەکەوێ و بەدوور بن لە کارەسات و رووداوەکانی هاتوچۆ.
دوو رۆژە شەپۆلێکی بەفر و بارانبارین رووی لە ناوچەکانی هەرێمی کوردستان کردووە و لە چەند شوێنێک بەفر ئاستەنگی هاتوچۆی دروست کردووە.
بەفر لە زینی وەرتێ و ئیدارەی سۆران هاتوچۆی ئۆتۆمبێلی سەخت کردووە
