بەدواداچوون بە بڕینەوەی دارسنەوبەرەکانی هەڵەبجە دەکرێت - وێنە: بەڕێوەبەرایەتی کشتوکاڵی هەڵەبجە
حاڵەتێکی گوماناویتان بینی لایەنی پەیوەندیدار ئاگادار بکەنەوە
بەدواداچوون بۆ بڕینەوەی سنەوبەرەکانی هەڵەبجە دەکرێت
964+
شۆڕش قادری
بەڕێوەبەرایەتیی دارستان و پاوانی هەڵەبجە بەدواداچوون بۆ بڕینەوەی دارسنەوبەرەکان دەکات، کە تەمەنی هەندێکیان نزیکەی 50 ساڵ دەبێت و لەناوبراون.
محەمەد مەحمود بەڕێوەبەری دارستان و پاوانی هەڵەبجە بە 964ـی وت، “ئەمڕۆ یەکشەممە 2.2.2025 بەمەبەستی بەدواداچوون بۆ بڕینەوەی چەند دار سنەوبەرێک لە پڕۆژەی دارستانی گوڵان بە هەماهەنگی لەگەڵ پۆلیسی دارستان و ژینگەی هەڵەبجە، سەردانی شوێنەکەمان کرد”.
“پاش بینینی شوێنی دارەبڕاوەکان، بڕیاردرا بەدواداچوونی جددی بکرێت بە هاوکاری لایەنە پەیوەندیدارەکان و دۆزینەوەی سەرپێچی کاران و پاشان رووبەڕووی دادگایان دەکەینەوە”، محەمەد مەحمود وای وت.
ئاماژەی بەوەش کرد، لە چەند شوێنێکی دارستانی گوڵاندا، دارسنەوبەر بڕدراونەتەوە کە تەمەنی هەندێکیان نزیکەی 50 ساڵ دەبێت.
بەڕێوەبەری دارستان و پاوانی هەڵەبجە لەڕێی 964ـەوە داوای لە هاوڵاتیانی سنوورەکە کرد، هەر کار و جوڵەیەکی گوماناویان بینی، لەهەر دارستانێکی دەستکرد یان سروشتی، لایەنی پەیوەندیداری لێ ئاگادار بکەنەوە.
ژینگەی هەڵەبجە بەدواداچوون بۆ وشکبوونی دوو درەخت دەکات
